Տավուշի մարզպետարանում` Հայաստանի փոխվարչապետ, տարածքային կառավարման նախարար Արմեն Գեւորգյանի ղեկավարությամբ, այսօր` փետրվարի 12-ին խորհրդակցություն է կայացել որի ընթացքում քննարկվել է Տավուշի մարզի 2009-2011թ. սոցիալ-տնտեսական զարգացման ծրագրի կատարման ընթացքը:
Հայաստանի տարածքային կառավարման նախարարությունից NEWS.am-ին հայտնում են, որ ներկայացվել են ծրագրի իրականացման ուղղությամբ կատարված աշխատանքները, արձանագրված խնդիրները: Զեկուցվել է, որ մարզի զարգացման ծրագրով 2010թ. իրականացվել են 6,5 մլրդ դրամի ներդրումային ծրագրեր` նախատեսված 5,5 մլրդ դրամի դիմաց:
Ծրագրի կատարման ընթացքն ընդհանուր առմամբ բավարար համարվեց: Փոխվարչապետը նշեց, որ Տավուշի եւ Գեղարքունիքի զարգացման ծրագրերը նամանատիպ առաջին ծրագրերն են, որոնք կավարտվեն այս տարի, եւ դրանց իրականացման փորձը հաշվի կառնվի ինչպես նոր ծրագրերի մշակման, այնպես էլ ընթացքում գտնվողների իրականացման գործընթացում:
Ներկայացվել է նաեւ համայնքների 2011 թ. բյուջեների հաշվարկային ցուցանիշների համեմատական վերլուծությունը 2010թ. ցուցանիշների նկատմամբ:
Արմեն Գեւորգյանը մարզպետ Արմեն Ղուլարյանի եւ Իջեւանի քաղաքապետ Վարուժան Ներսիսյանի հետ քննարկել է նաեւ Իջեւանի տեղական ինքնակառավարման մարմիններում ստեղծված իրավիճակը: Համայնքի ղեկավարին առաջարկվել է սահմանված կարգով հրավիրել ավագանու հերթական նիստ եւ դրա արդյունքներով դիմել մարզպետին` գործող օրենսդրության շրջանակում ավագանու նոր ընտրություններ կազմակերպելու համար:
