Հարգելի հանրապետականներ, ձեզ անընդհատ սխալ ուղղությամբ են տանում. այդ հին Ընտրական օրենսգիրքը պահելով՝ դուք մեզ մեծ ծառայություն եք մատուցում: Այս մասին, այսօր՝ հոկտեմբերի 24-ին, ԱԺ-ում որպես վարչապետի թեկնածու իր ելույթում նշեց Նիկոլ Փաշինյանը:
Նա նշեց, որ ԸՕ-ն ուզում են փոխել, որպեսզի ընտրական պրոցեսը հնարավորինս քաղաքական բանավեճի տրամաբանության մեջ դնեն. «Հենց ռեւանշիստական մղումները պահեցիք, ուզենք, թե չուզենք, ընտրությունները լինելու են սեւ ու սպիտակի տրամաբանության մեջ եւ դուք զրո ձայն եք ստանալու։ Ձեր միակ շանսը ընտրությունները քաղաքականցնելն է, որ խոսենք, խնդիրներից, բյուջեից, տնտեսական հեռանկարներից: Ի վերջո, այս ռեւանշիստական բաները թողեք, որովհետեւ դա ձեզ մենակ վնասում է։ Համակերպվեք, որ գոնե ընդդիմություն մնալու շանսը պահպանեք:
Հին ԸՕ-ով դուք ընդհանրապես չեք անցնելու, ձեր միակ շանսը փոփոխված Ընտրական օրենսգիրքն է։ Ինչքան լարվածությունը մեծ եղավ, դա ձեր դեմ է աշխատելու: Դուք եք չէ՞ անընդհատ ասում՝ այս մթնոլորտը պետք է փոխենք։ Շարմազանովը հարցնում է՝ բարիկադները մենք ենք կառուցել: Բա ո՞վ է կառուցել. դուք եք կառուցել ձեր կոռուպցիայով, դավադրություններով: Մենք բարիկադների վրա լավ ենք զգում, եթե ուզում եք կառուցել՝ կառուցեք, մենք խնդիր չունենք»,-ընդգծեց Փաշինյանը:
