Հայաստանի վարչապետի պաշտոնակատար Նիկոլ Փաշինյանը հրաժարվեց ԱՄՆ նախագահի ազգային անվտանգության հարցերով խորհրդական Ջոն Բոլթոնին հայտնել իր հաջողության գաղտնիքը: Այս մասին Բոլթոնը կատակով հայտարարեց հանդիպման արդյունքներով Երեւանում կայացած մամուլի ասուլիսի ժամանակ:
ԱՄՆ նախագահի խորհրդականը նշեց, որ Փաշինյանի հետ հանդիպմանը քննարկել են դեկտեմբերին անցկացվելիք առաջիկա ընտրությունները եւ այն, որ դրա հետ կապված որոշ հարցեր կհետաձգվեն: Բոլթոնն արձանագրեց, որ հասարակության շրջանում հաստատուն կարծիք կա, որի համաձայն ընտրությունների արդյունքում վարչապետը «ուժեղ մանդատ» կստանա: «Ես հարցրեցի, թե որն է նրա հաջողության գաղտնիքը: Նա հրաժարվեց պատասխանել,- կատակեց Բոլթոնը: - Գուցե ընտրություններից հետո կասի»:
Նրա խոսքով՝ սպասումների իրականացման դեպքում Փաշինյանը հնարավորություն կստանա մի շարք վճռական քայլեր կատարելու համար: Բոլթոնը հայտնեց, որ այցի շրջանակում հանդիպել է նաեւ փորձագետների հետ, եւ հանդիպումը կրկին հաստատել է, որ հայ հանրության համար անկյունաքարը Լեռնային Ղարաբաղի հակամարտության կարգավորումն է: