Ես ցանկացած հանդիպման ժամանակ Վիեննայի եւ Սանկտ Պետերբուրգի պայմանավորվածությունների մասին խոսում եմ: Այս մասին, այսօր՝ հոկտեմբերի 27-ին, լրագրողների հետ զրույցում նշեց ՀՀ վարչապետի պաշտոնակատար Նիկոլ Փաշինյանը՝ անդրադառնալով Ղարաբաղի բանակցություններին:
«Բայց ի տարբերություն նախորդ իշխանությունների, շատ արագ մեզ հաջողվել է կոնկրետ քայլեր անել, կոնկրետ պայմանավորվածություններ ձեռք բերել, այդ թվում զինադադարի շատ թե քիչ պահպանման ուղղությամբ: Հիմա գո՞հ եք դրանից, թե՞ դժգոհ եք»,-ասաց նա:
Դիտարկմանը, թե նման պայմանավորվածությունը որակվում է ստվերային, Նիկոլ Փաշինյանը նշեց, թե այդ դեպքում պետք է ցույց տալ մի դեպք, երբ ՀՀ-ի որեւէ ղեկավար հանդիպել է Ադրբեջանի որեւէ ղեկավարի հետ, հետո եկել նստել ուղիղ եթերում ասել է, թե ինչ են պայմանավորվել:
«Այսինքն ի՞նչ ստվերային պայմանավորվածության մասին է խոսքը: Դուք կարո՞ղ եք բացատրել, թե ինչ մոտիվացիա կա Ղարաբաղի հարցում որեւէ բան թաքցնելու: Եթե այդտեղ կոռուպցիոն գործարք չկա, դավադրություն չկա, դավաճանություն չկա, ի՞նչ մոտիվացիա կա ինչ-որ բան թաքցնելու: Եթե իրենք անընդհատ թաքցրել են, ինչի՞ համար են թաքցրել: Այդտեղ կոռուցպիա է եղե՞լ, դավադրություն, թե՞ դավաճանություն: Ինչու ամեն հանդիպումից հետո չեն եղել ուղիղ եթեր մտել ասել՝ Ալիեւի հետ խոսել ենք սա, սա, սա, պայմանավորվել ենք սա, սա, սա եւ իրականացրել ենք սա, սա, սա:
Ես ասել եմ, որ ուղիղ կոմունիկացիա պետք է լինի, եւ երբ որ կոմունիկացիան հաստատվել է, ես տեղեկացրել եմ, որ կոմունիկացիան հաստատված է, այսինքն` այդ ինչ ստվեր է, էլ ի՞նչ պետք է լիներ: Ասյինքն ի՞նչ են ստվերային պայմանավորվել, որ ի՞նչ լինի»,-ընդգծեց Նիկոլ Փաշինյանը՝ հավելելով, որ կողմերը հիմնականում պահպանում են պայմանավորվածությունը:
