Թբիլիսիի կենդանաբանական այգու Գրանդ փիղը BBC-ի վայրի բնության մասին՝ Big Animal Surgery (խոշոր կենդանիների վիրահատությունները) նոր բազմասերիալանոց վավերագրական ֆիլմի հերոսը կդառնա, հաղորդում է «Նովոստի Գրուզիան»՝ վկայակոչելով կենդանաբանական այգու աշխատակազմին:
Առաջիկայում պետք է Գրանդի երկրորդ կոտրված ժանիքի հեռացման վիրահատություն կատարվի: Առաջինը 4 տարի առաջ են հեռացրել: Այդ ժամանակ վիրահատությունը կատարել էր հայտնի բրիտանացի անասնաբույժ- ատամնաբույժ Փիթեր Քերթեսը, որը Լոնդոնից հատուկ այդ նպատակով ժամանել էր Վրաստան: Վիրահատությունը ուղիղ եթերով հեռարձակվել էր համացանցում եւ ընթացքին հազարավոր մարդիկ էին հետեւել:
«Հոկտեմբերի 31-ին Գրանդը պետք է նորից հիվանդի դեր ստանա եւ ոչ միայն հիվանդի: Այս անգամ մեր փիղը նաեւ BBC սերիալի հերոսը կդառնա», — նշվում է հաղորդագրությունում:
Հաղորդվում է, որ BBC պրոդյուսերները կապ են հաստատել կենդանաբանական այգու աշխատակազմի հետ նկարահանումների մասին պայմանավորվելու համար:
«Այո, այո: Սերիալի մի ամբողջ դրվագ Գրանդին կնվիրեն: Սա կատակ չէ, վայրի բնության մասին հրաշալի վավերագրական սերիալներ ստեղծող BBC-ն ամբողջ աշխարհին կծանոթացնի Թբիլիսիի կենդանաբանական այգու փղի հետ», - հավելել են կենդանաբանական այգուց:
Big Animal Surgery-ն վիրահատությունների մասին հաղորդում է, որոնք անցկացնում են աշխարհի տարբեր երկրներում կենդանիների փրկության համար: Հաղորդման նկարագրության մեջ նշվում է, որ դրվագները նկարահանվել են ողջ աշխարհուվ՝ Ուգանդայի լեռներից մինչեւ Սիերա Լեոնեի արեւադարձային անտառներ:
2014 թվականի հունիսին 6 տոննա կշռով փղին Թբիլիսի են տեղափոխել Երեւանից Մալկա էգ փղի հետ բնակեցնելու համար: Փոխարենը Հայաստան են ուղարկել Մալկայի որդուն՝ 6-ամյա Բունկուին:
