Ազգային ժողովի պատգամավորների 1/3-ն այսօր՝ հոկտեմբերի 30–ին, վարչապետի պաշտոնակատար Նիկոլ Փաշինյանին առաջադրել է վարչապետի թեկնածու: Այս մասին NEWS.am–ին ասաց ԱԺ լրատվության եւ հանրության հետ կապերի վարչության ղեկավար Կնյազ Սարոյանը։
Ստորագրահավաքին միացել են 43 պատգամավորներ, այդ թվում «ԵԼՔ-ի, «Ծառուկյան» խմբակցության և ՀՀԿ-ի քաղաքական թիմից հեռացած 4 պատգամավորները՝ Արսեն Միխայլովը, Կնյազ Հասանովը, Տաճատ Վարդապետյանն ու Շիրակ Թորոսյանը։
Նշենք, որ այսօր ժամը 18։00–ին լրանում է առաջադրումների ժամկետը։
Հիշեցնենք, որ հոկտեմբերի 27–ին լրագրողների հետ զրույցում Նիկոլ Փաշինյանը նշել էր, որ իր այս առաջադրումը եւս ֆորմալ բնույթ է կրելու։
ՀՀ Սահմանադրության 149-րդ հոդվածի համաձայն վարչապետ չընտրվելու դեպքում վարչապետի ընտրության առաջին քվեարկությունից (հոկտեմբերի 24) յոթ օր հետո (հոկտեմբերի 31) անցկացվում է վարչապետի նոր ընտրություն, որին մասնակցելու իրավունք ունեն պատգամավորների ընդհանուր թվի առնվազն մեկ երրորդի առաջադրած վարչապետի թեկնածուները: Եթե պատգամավորների ընդհանուր թվի ձայների մեծամասնությամբ վարչապետ չի ընտրվում, ապա Ազգային ժողովն արձակվում է իրավունքի ուժով:
Վարչապետի ընտրությունն անցկացվում է անվանական քվեարկությամբ:
Հիշեցնենք, որ Նիկոլ Փաշինյանը վարչապետի պաշտոնից հրաժարական է տվել հոկտեմբերի 16-ին: Հոկտեմբերի 24-ին Ազգային ժողովում տեղի է ունեցել վարչապետի ընտրության առաջին փուլը, որտեղ վարչապետ չի ընտրվել: Ամենայն հավանականությամբ, ԱԺ արտահերթ ընտրությունները տեղի կունենան դեկտեմբերի 9-ին՝ կիրակի:
