Արցախի Ազգային ժողովի նախագահ Աշոտ Ղուլյանը հոկտեմբերի 30-ին ընդունել է Բելգիայի Դաշնային խորհրդարանի անդամ, «Ռեֆորմիստական շարժում» կուսակցության միջազգային կապերի գծով նախագահ Ժան-Ժակ Ֆլաոյին եւ կուսակցության միջազգային կապերի փոխնախագահ Ջուլի Սզմային, ովքեր Արցախ են ժամանել Հայ դատի Եվրոպայի հանձնախմբի նախագահ Գասպար Կարապետյանի եւ հանձնախմբի գործադիր տնօրեն Հեղինե Էվինյանի ուղեկցությամբ:
Արցախի ԱԺ մամուլի ծառայությունից տեղեկացնում են, որ ողջունելով հյուրերին՝ խորհրդարանի ղեկավարը նշել է, որ այս հանդիպումը հարմար առիթ է՝ խոսելու մարդկային ու ժողովրդավարական այն արժեքների մասին, որոնք միավորում են երկու երկրների ժողովուրդներին՝ անկախ իրենց ծննդավայրից: Աշոտ Ղուլյանը նաեւ կարեւորել է մեկ տարի առաջ Արցախի եւ Բելգիայի միջեւ ձեւավորված ինստիտուցիոնալ հարաբերությունները՝ հատուկ նշելով «Արցախի Հանրապետություն - Բելգիայի ֆրանսախոս օրենսդիրների, գիտական ու հասարակական ոլորտների ներկայացուցիչների հետ բարեկամության շրջանակի» դերակատարությունը:
Այս համատեքստում խորհրդարանի ղեկավարն առաջարկել է մտածել համագործակցության կոնկրետ օրակարգի ձեւավորման մասին:
Շնորհակալություն հայտնելով ընդունելության համար՝ Բելգիայի դաշնային խորհրդարանի անդամ Ժան-Ժակ Ֆլաոն նշել է, որ խորհրդարաններն ու խորհրդարանականները պետք է կարողանան հարաբերվել առանց դժվարությունների, ինչը թույլ կտա ապահովել տնտեսությունների եւ այլ կարեւոր բնագավառների զարգացումը:
Հանդիպման ընթացքում կողմերը քննարկել են նաեւ միջկուսակցական համագործակցության հնարավորություններին եւ խորհրդարանում ու քաղաքական կյանքում կանանց ներկայացվածությանը վերաբերող թեմաներ:
Հանդիպմանը մասնակցել են ԱԺ նախագահի տեղակալ, «Արցախի Հանրապետություն - Բելգիայի ֆրանսախոս օրենսդիրների, գիտական ու հասարակական ոլորտների ներկայացուցիչների հետ բարեկամության շրջանակի» նախագահ Վահրամ Բալայանը, ԱԺ արտաքին հարաբերությունների մշտական հանձնաժողովի նախագահ Արզիկ Մխիթարյանը եւ ԱԳ նախարարի տեղակալ Ֆելիքս Խաչատրյանը:
Բելգիայի դաշնային խորհրդարանի անդամներն այնուհետեւ հանդիպել են «Արցախի Հանրապետություն - Բելգիայի ֆրանսախոս օրենսդիրների, գիտական ու հասարակական ոլորտների ներկայացուցիչների հետ բարեկամության շրջանակի» անդամների հետ:
Բարեկամության շրջանակի նախագահ Վահրամ Բալայանը, բացելով հանդիպումը, կարեւորել է հյուրերի այցը եւ հետագա հարաբերությունների ձեւավորումը՝ հաշվի առնելով ադրբեջանական ջանքերը՝ Արցախն արհեստականորեն մեկուսացնելու ուղղությամբ: Վահրամ Բալայանը նաեւ նշել է, որ Արցախը պետք է դիտարկել ոչ թե որպես տարածք՝ այլ ժողովուրդ, որն ունի արժանավայել կյանքով ապրելու իրավունք:
Հանդիպման ընթացքում կողմերը զրուցել են նաեւ երկու երկրների խորհրդարանական համակարգերին, դրանց կառուցվածքին եւ խորհրդարանական դիվանագիտությանը վերաբերող թեմաների շուրջ:
Առավոտյան պատվիրակությունն այցելել է Ստեփանակերտի հուշահամալիր, ծաղիկներ դրել եւ հարգանքի տուրք մատուցել Արցախի անկախության համար զոհված հայորդիների հիշատակին: