Նորք Մարաշի «Զինված խմբի» գործով ամբաստանյալներից Վահան Շիրխանյանի պաշտպան Հայկ Ալումյանը կարծում է, որ բոլոր նախադրյալները կան, որպեսզի համաներումը տարածվի նաեւ այդ գործով անցնող անձանց նկատմամբ։
Համաներման նախագծի համաձայն, այն կիառվելու է «Սասնա ծռերի» եւ Ժիրայր Սեֆիլյանի եւ մյուսների գործով անցնող անձանց նկատմամբ, եթե համաձայնություն տան տուժողները։
«Կուզեի, որ համաներումը տարածվեր նաեւ Նորքի գործով անցնող անձանց վրա, ինչպես որ «Սասնա ծռերի» նման, հատկապես որ զոհեր չկան։ Խնդիրը բարձրացվել է, հրապարակայնացվել է, վստահ եմ՝ իրենք տեսնում են խնդիրը, եթե ցանկություն ունենան, կարող են ներառել նաեւ մեր գործով անցնող անձանց, սակայն, չգիտեմ՝ ցանկություն ունեն, թե չէ»,– NEWS.am–ի հետ զրույցում ասաց Հայկ Ալումյանը։
Պաշտպանը հիշեցրեց, որ «Զինված խմբի» գործով անձինք որեւէ ակտիվ գործողություն չեն կատարել, հետեւաբար, բոլոր նախադրյալները կան, որպեսզի նրանց նկատմամբ նույնպես համաներում կիրառվի։
Նշենք, որ համաներման նախագիծն Ազգային ժողովում քննարկվելու է հոկտեմբերի 31–ի արտահերթ նիստում։