ԱԺ գործարար պատգամավոր Սամվել Ալեքսանյանը, ով առաջին անհրաժշտության մի քանի ապրանքատեսակների (ցորեն, յուղ, ձեթ, շաքարավազ, դեղորայք) մենաշնորհային ներկրող է, չի բացառում, որ առաջիկայում նշված ապրանքատեսակների թանկացում տեղի ունենա: Նա այս մասին հայտնեց NEWS.am-ի թղթակցի հետ զրույցում` մասնավորապես նշելով. «Աշխարհում ամեն ինչն էլ թանկանում ա, ես չեմ կարա ասեմ, թե մի ամիս հետո ինչ կլինի, ոնց կլինի: Եթե իմանամ, մի շաբաթ կամ մի ամիս հետո ինչ կլինի, ես աշխարհի ամենահարուստ մարդը կըլնեմ»,-հայտարարեց Ալեքսանյանը:
Ինչ վերաբերում է իրեն պատկանող «Երեւան Սիթի» խանութների փակման մասին լուրերին, ապա Ալեքսանյանը զայրացած տոնով նշեց, որ մի քանի անբարեխիղճ լրատվամիջոցներ «ընգել են Սիթիների հետեւից եւ ինչ սուտ շառ ասես անում են»: Պատգամավորը նշեց, որ խանութների փակման մասին խոսք լինել չի կարող:
Ի դեպ, օրաթերթերից մեկը օրերս անդրադարձել էր Ս. Ալեքսանյանին պատկանող Սեւանում գործող հացի գործարանին, որն ակնհայտ գերակա դիրք ունի այդ շուկայում: Թերթը գրել էր, թե նշված գործարան են այցելել հարկային տեսուչները եւ լայնածավալ ստուգումներ սկսել: Բացի դա, հարկային մարմինները զմռսել են նաեւ Երեւանում գտնվող մի շարք այլ հացի փռեր, որոնք կամ ամբողջությամբ, կամ մասնակիորեն պատկանել են Սամվել Ալեքսանյանին: Վերջինս այս կապակցությամբ բավարարվեց ընդամենն ասելով, թե իրեն պատկանող ձեռնարկություներում հարկային ստուգումներ պարբերաբար իրականացվում են: «Դա նորությու՞ն ա»,-տարակուսեց պատգամավորը: