Մենք պատրաստ ենք հայ–թուրքական հարցի կարգավորման շուրջ բանակցային գործընթացին։ Այս մասին այսօր՝ նոյեմբերի 1–ին, ԱԺ–ում ասաց վարչապետի պաշտոնակատար, վարչապետի միակ թեկնածու Նիկոլ Փաշինյանը՝ պատասխանելով ԱԺ ՀՅԴ խմբակցության պատգամավոր Ռուզաննա Առաքելյանի հարցին։
«Բացառում եմ, որ մեր կառավարությունը եւ մեր ժողովուրդը հարկադրանքի, սպառնալիքի, շրջափակումների գործադրմամբ կարող է որեւէ քայլ անել։ Ընդհակառակը, մենք այդ պայմանների գործադրմամբ ավելի կամրանանք եւ ի վերջո կհասնենք մեր ազգային նպատակներին»,–ասաց նա։
Նիկոլ Փաշինյանը, մեջբերելով իր եւ փորձառու դիվանագետներից մեկի՝ հայ–թուրքական հարցի վերաբերյալ զրույցը, ասաց.
«Վերջերս մի շատ փորձված դիվանագետի հետ հանդիպման ժամանակ ես նրան ներկայացրի Հայաստանի իրավիճակը։ Ասացի՝ մեր 4 սահմաններից 2–ը փակ են՝ Ադրբեջանի հետ սահմանը փալ է Ղարաբաղյան հակամարտության պատճառով եւ Թուրքիայի հետ սահմանը՝ նույնպես Ղարաբաղյան հակամարտության պատճառով»,–ասաց նա։
Ըստ Փաշինյանի՝ աբսուրդ է, երբ մի երկիր մյուս երկրի հետ հարաբերությունները կապում է երրորդ երկրի հետ նրա ունեցած հարաբերություններով։
«Կարող է թվալ, թե մյուս երկու սահմանները բաց են, բայց այդ սահմանները կիսաբաց են, որովհետեւ հայ–իրանական սահմանը, օրինակ ամեն պահի կարող է դե ֆակտո փակվել ԱՄՆ–ի եւ Իրանի հետ հարաբերությունների եւ մնացած աշխարհաքաղաքական խնդիրների պատճառով։ Հայ–վրացական սահմանը դե ֆակտո կարող է փակվել, օրինակ, վատ եղանակային պայմանների կամ աշխարհաքաղաքական պայմանների պատճառով։ Ես նրան ասացի, որ կարող ենք արձանագրել, որ Հայաստանի Հանրապետությունը կղզի է՝ առանց ծովի, եւ քանի որ դուք շատ փորձված դիվանագետ եք, կարո՞ղ եք խորհուրդ տալ, թե այս պայմաններում ինչպես պետք է վարվի Հայաստանը։ Սա վերջին փաստարկն էր, որը փորձված դիվանագետին օգնեց՝ ընդունել այն դիրքորոշումներն ու փաստարկները, որոնք մենք բերում էինք արտաքին քաղաքական շատ կնճռոտ մի հարցի քննարկման ժամանակ»,–ասաց նա։
Վարչապետի պաշտոնակատարը պնդեց հայ–թուրքական հարաբերությունների կարգավորման վերաբերյալ նախկինում հայտնած տեսակետը.
«Հայաստանի Հանրապետությունը պատրաստ է հայ–թուրքական հարաբերությունների կարգավորմանը՝ առանց նախապայմանների։ Խնդրում եմ որեւէ մեկը սա չմեկնաբանի, թե մենք այս դիրքորոշմամբ որեւէ կերպ նսեմացնում ենք 1915 թ. Հայոց ցեղասպանության միջազգային ճանաչման հարցը, որովհետեւ Ցեղասպանության ճանաչման հարցը մեր ընկալմամբ Հայ–թուրքական հարաբերություններում խնդիր չէ։ Դա ոչ միայն Հայաստանի, այլեւ միջազգային անվտանգության խնդիր է, դա մեր ներդրումն է ցեղասպանությունների կանխարգելման համաշխարհային շարժմանը»,– ասաց նա
Փաշինյանը հիշեցրեց, որ հայ–թուրքական սահմանը փակ է Թուրքիայի կողմից՝ Ղարաբաղյան հակամարտության պատճառով։
«Դա վատ քաղաքականություն է, որովհետեւ եթե որեւէ մեկը հույս ունի, թե Հայաստանի Հանրապետությանը կամ Ղարաբաղի ժողովրդին կարող է հարկադրանքի եւ սպառնալիքի ճանապարհով մղել Ղարաբաղյան հարցի կարգավորման այս կամ այն տարբերակին, ինքն ուղղակի սխալվում է»,–ասաց նա։