Ես հեռու եմ այն մտքից, որ 6 ամսում թռնելու էինք եւ ապրեինք դրախտում։ Այս մասին այսօր՝ նոյեմբերի 1–ին, խորհրդարանում վարչապետի ընտրության հարցի քննարկման ժամանակ ասաց ԱԺ փոխնախագահ, ՀՀԿ–ական Էդուարդ Շարմազանովը։
ՀՀԿ–ական պատգամավորը հիշեցրեց, որ երբ մայիսին Նիկոլ Փաշինյանն առաջադրվում էր որպես վարչապետի թեկնածու, հայտարարվում էր, որ սիրո եւ թավշյա հեղափոխությունից հետո Հայաստանը թեւակոխելու է թռիչքային զարգացում։
«Հիմա փաստերով խոսենք։ Ներդրուամյին միջավայրի մասին. առաջին եռամսյակի համեմատ երկրորդ եռամսյակում ներդրումները երեք անգամ պակասել են։ Երկրորդ, այս բյուջեով գրված էր 6.5 տոկոս տնտեսական աճ, իսկ հաջորդ տարվա բյուջեի նախագծով սպասում ենք 4.9 տոկոս աճ, 3.5 տոկոս գնաճ է նախատեսվում եւ 0 տոկոս աշխատավարձերի բարձրացում։ Երրորդ, 10–15 աշխատատեղ բացում եք, «Հայլուրը» մի շաբաթ ցույց ա տալիս, այն դեպքում, որ Ալավերդիի պղնձաձուլական գործարանը փակվում է, 650 աշխատող մնում է առանց աշխատանքի»,– ասաց Շարմազանովը։
ԱԺ փոխնախագահն անդրադարձավ նաեւ կարմիր գծերին եւ տեսախցիկներին։ Նա նկատեց, որ հեղափոխությունից առաջ Փաշինյանն ու իր թիմակիցներն ասում էին՝ կարմիր գծերն ու տեսախցիկները պետք է վերանան, իսկ հեղափոխությունից հետո լրիվ այլ պատկեր է. «Հիմա պարզվում է՝ կարմիր գծերը պետք են, որ մանկապարտեզները վերանորոգենք, իսկ կամերաներն էլ պետք է շատացնենք։ Կներեք, բայց ձեր կողմնակիցները հեղափոխության ժամանակ ներքնաշորերով կամերաներն էին փակում։ Հաջորդը, որ գնացիք Գումի շուկա, պոմիդորի եւ վարունգի գինը հարցրեցիք, ժողովուրդը ավելի էժան առա՞վ դրանից հետո, թե՞ չէ»։
Անդրադառնալով արտաքին քաղաքականության վերաբերյալ Նիկոլ Փաշինյանի այն հայտարարությանը, թե նախկին իշխանությունները ծուռ վզով էին բանակցություններ վարում, Շարմազանովը նշեց. «Եթե դուք վիզ ծուռ եք համարում, որ ԵՏՄ է մտել Հայաստանը, ՀԱՊԿ–ի գլխավոր քարտուղարի պաշտոնն ենք ստացել, ԵՄ–ի հետ համաձայնագիր ենք ստորագրել, բա էդ դեպքում հպարտ վզով քաղաքականությունը ո՞րն է։ Դա էլ տեսանք՝ Բոլթոնը եկավ, առաջին անգամ ասաց, որ դուք ձեր պատմական կաղապարներից հրաժարվեք։ Ո՞րն է դա։ Անվտանգության մասին խոսենք։ Հայաստանի անդամակցումը ՀԱՊԿ–ին այլընտրանք չունի, գլխավոր քարտուղարին մեղադրանք առաջադրվեց, դա իրավական հարց է, չեմ անդրադառնա, բայց ձեր իշխանության ներկայացուցիչները ասում են, որ Հայաստանն ամեն ինչ պետք է անի, որ ՀԱՊԿ–ում շարունակի ստանձնել գլխավոր քարտուղարի պաշտոնը։ Ակնկալում եմ, որ նոյեմբերի 8–ին ամեն ինչ կանեք, որ պահպանենք մեր մանդատը։ Դա նվեր կլինի բոլորիս, իմ ծննդյան օրն էլ է այդ օրը, եւ այդ նվերը ես կընդունեմ ձեզնից»։
Ելույթի ավարտին Շարմազանովը շնորհակալություն հայտնեց բոլորին՝ նշելով, որ հնարավոր է՝ սա իր վերջին ելույթն է այս ամբիոնից։
