Երեւանի արտաքին լուսավորության համակարգում էներգախնայողության ծրագրի առաջարկ է ներկայացրել Հայաստանում ՄԱԿ-ի մշտական համակարգող Դաֆինա Գերչեւան, այսօր՝ փետրվարի 14-ին Երեւանի քաղաքապետի հետ հանդիպման ժամանակ:
Քաղաքապետարանի մամուլի ծառայությունից NEWS.am-ին հայտնում են, որ այդ ծրագիրը Ֆինանսական աջակցություն ստանալու նպատակով, կներկայացվի Գլոբալ էկոլոգիական հիմնադրամին: Ծրագրի արդյունքում, փորձագիտական հաշվարկներով, մայրաքաղաքում էներգածախսերը կկրճատվեն շուրջ 4 անգամ:
«Քաղաքապետարանը համագործակցության համար բաց է ցանկացած բնագավառում եւ ակնկալում է ՄԱԿ–ի աջակցությունն այն ոլորտներում, որոնք կնպաստեն Երեւանի զարգացմանը» – նշել է քաղաքապետը, կարեւորելով գործակցությունը հատկապես քաղաքային կառավարման ոլորտի մասնագետների վերապատրաստման, առողջապահական, տրանսպորտի, կոմունալ տնտեսության կառավարման, կրթական եւ մի շարք այլ ոլորտներում:
«Այսօր մեզ համար շատ կարեւոր է Երեւանում գրավիչ բիզնես միջավայրի ստեղծումը եւ ներդրողների գրավումը: Իմ համոզմամբ, կան մի շարք ոլորտներ, որոնք ավելի լավ կարող են կառավարվել մասնավոր հատվածի կողմից: Քաղաքապետարանն այդ դեպքում միայն վերահսկողական գործառույթներ կիրականացնի», –ընդգծել է քաղաքապետը:
Կարեն Կարապետյանը ողջունել է նաեւ տիկին Գերչեւայի կողմից ներկայացված «Գեղեցիկ Երեւան» ծրագիրը, որի գաղափարը Երեւանը զբոսաշրջության տեսանկյունից առավել գրավիչ դարձնելն է:
Կողմերը պայմանավորվել են առաջիկայում ավելի առարկայական քննարկել առաջարկված եւ նախատեսվող համատեղ ծրագրերը:
