Իրանի նախագահ Հասան Ռոհանին իրանական միջուկային համաձայնագրից ԱՄՆ-ի դուրս գալուց եւ պատժամիջոցների վերսկսումից հետո Եվրոպային, Ռուսաստանին եւ Չինաստանին կոչ է արել ներկայկացնել եւ իրականացնել Իրանի կորուստների փոխհատուցման միջոցների վերջնական փաթեթը: Այս մասին նախագահը գրել է Financial Times-ում:
Ռոհանին նշել է, որ աշխարհը բախվում է բազմաթիվ խնդիրների հետ, այդ թվում տնտեսական, սոցիալական ճգնաժամների, քսենոֆոբիայի, ահաբեկչության եւ ծայրահեղականության:
Ըստ նրա, վերջին երկու տարիների ընթացքում ԱՄՆ արտաքին քաղաքականությունը դարձել է նոր եւ բարդ խնդիր, քանի որ Ամերիկան նոր մարտահրավերներ է ստեղծում միջազգային հարաբերությունների տարբեր ճակատներում:
«Ավելի լայն իմաստով առեւտրի, միջազգային պայմանագրերի վերաբերյալ ԱՄՆ նախագահ Դոնալդ Թրամփի քաղաքականությունը եւ նրա նվաստացնող մոտեցումը, որով նա վերաբերում է անգամ ԱՄՆ-ի դաշնակիցներին, ցույց է տալիս, թե ինչպես է ԱՄՆ-ի արտաքին քաղաքականությունը աշխարհակարգի համար նոր մարտահրավերներ առաջացնում:
Կարճ ասած, ԱՄՆ վարչակազմի միակողմանի քաղաքականությունը ռասայական խտրականության, իսլամաֆոբիայի եւ կարեւոր միջազգային պայմանագրերի, այդ թվում` Կլիմայի մասին Փարիզի Համաձայնագրի խաթարումը, սկզբունքորեն անհամատեղելի են Եվրոպայի բազմակողմ եւ այլ հասարակական-քաղաքական նորմերի եւ արժեքների հետ:
Կա եւս մեկ կարեւոր խնդիր, որը խորացնում է տրանսատլանտյան հարաբերությունները. Իրանի միջուկային համաձայնագիրը: Համաձայնությունից ԱՄՆ-ի դուրս գալուց հետո Իրանը կառուցողական բանակցություններ է վարել մյուս մասնակիցների հետ: Նրանց օժանդակությունը արժեքավոր էր, բայց կարեւոր է, որ եվրոպական կողմերը, ինչպես նաեւ Չինաստանը եւ Ռուսաստանը, ներկայացնեն եւ իրականացնեն միջոցառումների վերջնական փաթեթ` միակողմանի եւ արտերկրյա պատժամիջոցների հետեւանքները փոխհատուցելու եւ մեղմելու համար, մինչեւ որ դրանք կկիրառվեն:
Այսօրվա տագնապալից աշխարհում դժվարությունները հաղթահարելու միակ ճանապարհը փոխադարձ շահերի վրա հիմնված համաձայնեցված միջազգային ջանքերն են, այլ ոչ թե մեկ կամ մի քանի պետությունների կարճատես պահանջները», - ասել է Ռոհանին:
