ԱՊՀ երկրների Վարչապետների խորհրդի հաջորդ նիստը տեղի է ունենալու 2019 թվականի մայիսի վերջին Աշգաբադում: Այս մասին ԱՊՀ գործկոմի նախագահ Սերգեյ Լեբեդեւը հայտարարել է Աստանայում ընթացող Խորհրդի նիստում:
«Թուրքմենստանի առաջարկով որոշվել է Վարչապետների խորհրդի հաջորդ նիստն անցկացնել 2019 թվականի մայիսի վերջին Աշգաբադում, հավանաբար՝ մայիսի 31-ին»,- ՏԱՍՍ-ի փոխանցմամբ ասել է նա:
Նրա խոսքով՝ Աստանայում նեղ կազմով նիստում վարչապետները կարծիքներ են փոխանակել Համագործակցության շրջանակում տնտեսական փոխգործակցության հարցերի շուրջ: Արտահայտված բոլոր առաջարկները կվերլուծի ԱՊՀ գործկոմը՝ համապատասխան փաստաթղթեր պատրաստելու համար:
ԱՊՀ երկրների վարչապետները նիստի շրջանակում ստորագրել են տարբեր ոլորտներում համագործակցության մասին 18 փաստաթուղթ:
Դրանց թվում է միջուկային վթարի կամ ճառագայթման վթարային իրավիճակի առաջացման դեպքում փոխօգնության մասին համաձայնագիրը: Մյուս փաստաթղթերը վերաբերում են համագործակցությանը էներգետիկ մեքենաշինության ոլորտում, տեղեկությունների փոխանակման, թափոնների օգտագործման, հումանիտար հարցերում, մտավոր սեփականության եւ շրջակա միջավայրի պաշտպանության ոլորտում:
ԱՊՀ Վարչապետների խորհուրդը որոշում է ընդունել 2019 թվականին հակաօդային պաշտպանության միավորված համակարգի ստեղծման եւ զարգացման համար հատկացումներ կատարելու մասին: Համաձայնագիր է ստորագրվել նաեւ տիեզերքի հետազոտության համատեղ աշխատանքի մասին:
Կողմերը համաձայնեցրել են ԱՊՀ մարմինների 2019-2020 թվականների միասնական բյուջեն, Համագործակցության աշխատանքը որոշող այլ ֆինանսական եւ իրավաբանական փաստաթղթեր:
