Համաներման ակտի վերաբերյալ դժգոհություններ կունենան բոլոր նրանք, ովքեր իրենց այդ ակտի շահառու չեն համարում։ Այս մասին այսօր՝ նոյեմբերի 2–ին լրագրողների հետ հանդիպմանն ասաց ՀՀ արդարադատության նախարարի պաշտոնակատար Արտակ Զեյնալյանը՝ անդրադառնալով հարցին, թե ինչու՞ համաներումը չի տարածվելու 2015 թ. Նորք Մարաշում վնասազերծված զինված խմբի անդամների վրա։
«Պետք է տարբերակել իշխանության յուրացումը իշխանափոխությունից, քանի դեռ չկա վերջնական դատական ակտ, մենք չգիտենք թե դա ինչով է ավարտվելու, մենք կանխակալ վերաբերմունք ունենք, որ դատարանները կանխակալ դատական ակտ են կայացնելու , որովհետև այդ դատական ակտերից մարդիկ դժգոհ են լինելու։ Սա կառավարության կամքն է, այն կառավարության, որը լեգիտիմությունը ունի և համաներման ակտն այս ձևով ստացել է միայն կողմ քվեներ»,–ասաց նա։
Զեյնալյանը նշեց, որ պետությունը պետք է կատարի իր պոզիտիվ պարտականությունները և պայքարի հանցավորության դեմ։
«Պետք է կարողանալ կանխարգելել հնարավոր հանցագործությունները»,–ասաց նա։
Հիշեցնենք, որ Ազգային ժողովը նոյեմբերի 1-ի արտահերթ նիստում երկրորդ եւ վերջնական ընթերցմամբ ընդունեց Երեւանի 2800-ամյակին եւ Առաջին Հանրապետության 100-ամյակին նվիրված համաներման մասին օրենքի նախագիծը:
Համաներումը տարածվելու է ավելի քան 6500 քաղաքացիների վրա։