Անգլիայի բանկի ղեկավար Մարկ Քարնին հայտարարել է, որ 50 ֆունտ սթերլինգ արժեքով թղթադրամի վրա, որը բանկը մտադիր է թողարկել, պատկերված կլինի գիտնական կամ մաթեմատիկոս` բրիտանացիներին կոչ անելով վեց շաբաթվա ընթացքում իրենց տարբերակներն առաջարկել, հաղորդում է Reuters-ը:
50 ֆունտը ընդհանուր շրջանառության մեջ բրիտանական թղթադրամների ամենամեծ անվանական արժեքն է: Այս թղթադրամները հազվադեպ են օգտագործվում ամենօրյա գործարքների ժամանակ, քանի որ բրիտանացիները նախընտրում են թանկ գնումների ժամանակ կերդիտային կամ դեբետային քարտերով վճարել:
Ներկայումս շրջանառության մեջ է գտնվում Ջեյմս Ուատտի եւ նրա գործընկեր Մեթյու Բոլթոնի պատկերով թղթադրամը, որը կատարելագրոծել է շոգեշարժիչը եւ 18-րդ դարի վերջին այն ներդրել արդյունաբերական արտադրության մեջ:
«Ես ուրախ եմ, որ 50 ֆունտ սթերլինգ արժեքով նոր թղթադրամը կխորհրդանշի Մեծ Բրիտանիայի ավանդը գիտության մեջ: Կան բազմաթիվ մարդիկ, որոնք ձեւավորել են մեր ներկա աշխարհահայացքը», -Լոնդոնի գիտության թանգարանի միջոցառմանն ասել է Քարնին:
Անգլիայի բանկը Քարնիի ժամանակ թողարկել է պլաստիկ, կամ «պոլիմերային, թղթադրամներ, որոնք տարածված են իր հայրենիք Կանադայում: Մեծ Բրիտանիայի նախկին վարչապետ Ուինսթոն Չերչիլի պատկերով 5 ֆունտ սթերլինգ առաջին նման թղթադրամը շրջանառության մեջ է մտցվել 2016 թվականի սեպտեմբերին:
Ներկայումս շրջանառության մեջ 16,5 միլիարդ ֆունտ (21,5 միլիարդ դոլար) անվանական արժեքով 330 միլիոն 50 ֆունտ սթերլինգ թղթադրամ կա:
Անգլիայի Բանկի կայքում բրիտանացիները կարող են իրենց տարբերակները ներկայացնել մինչեւ դեկտեմբերի 14-ը: Կարգավորողի ներկայացուցիչները եւ չորս գիտնականները վերջնական ցուցակ կկազմեն, եւ Քարնին հաջորդ տարի կհայտարարի որոշումը:
