Գործարար Սիլվա Համբարձումյանը հաստատում է, որ խոշոր կաշառք է տվել ՀՀԿ-ական պատգամավոր, բնապահպանության նախկին նախարար Արամ Հարությունյանին:
Այսօր՝ նոյեմբերի 2–ին, լրագրողների հետ հանդիպմանը գործարարը հայտնեց, որ գումարը փոխանցել է Արաքս Դիլանյանի հաշվին, որն էլ հետագայում այն փոխանցել է Արամ Հարությունյանի ազգականների եւ ընկերների հաշիվներին։
«Երբ թավշյա հեղափոխությունը տեղի ունեցավ, ես դիմեցի Հանրապետության գլխավոր դատախազին, որ գործը բացվի։ Դրանից հետո եկել է Դուբայից թուղթը եւ ապացուցվել է, որ ես գումարը փոխանցել եմ Արաքս Դիլանյանին, նա էլ՝ Արամ Հարությունյանի ընկերների, ազգականների հաշվին։ Այժմ քննություն է ընթանում»,– ասաց Սիլվա Համբարձումյանը։
Հարցին, թե ինչի համար է 6 մլն դոլար փոխանցել Արամ Հարությունյանին, Սիլվա Համբարձումյանը պատասխանեց. «Հանքեր ձեռք բերելու համար, կաշառք։ Հանքերը ձեռք բերեցինք, զրկեցին, անմիջապես զրկեցին, չկարողացանք շնչել այդ բերկրանքով ու ուրախությամբ»։