ԵԱՀԿ Մինսկի խմբի համանախագահներ Իգոր Պոպովը, Ստեֆան Վիսկոնտին եւ Էնդրյու Շոֆերը ԵԱՀԿ գործող նախագահ Անջեյ Կասպրշիկի անձնական ներկայացուցչի հետ տարածաշրջան այցի արդյունքներով հանդես են եկել հայտարարությամբ։
Այցի գլխավոր նպատակը եղել է Դուշանբեում սեպտեմբերին կայացած ԱՊՀ գագաթաժողովի օրերին Հայաստանի եւ Ադրբեջանի ղեկավարների զրույցի արդյունքների քննարկումը, ղարաբաղյան հակամարտության խաղաղ կարգավորման գործընթացում հետագա քայլերի ուղենշումը եւ տեղում իրավիճակի ընդհանուր գնահատումը։
Համանախագահները հոկտեմբերի 29-ին Երեւանում հանդիպել են վարչապետի պաշտոնակատար Նիկոլ Փաշինյանի հետ եւ նոյեմբերի 1-ին Բաքվում՝ Իլհամ Ալիեւի հետ։ Երկու մայրաքաղաքներում էլ նրանք խորհրդակցություններ են անցկացրել արգործնախարարների եւ պաշտպանության նախարարների հետ։ Հոկտեմբերի 30-31-ը համանախագահները հանդիպել են Լեռնային Ղարաբաղի դե-ֆակտո իշխանությունների հետ եւ այցելել են Քելբաջարի ու Աղդամի շրջաններ։ Հոկտեմբերի 31-ին նրանք մասնակցել են Աղդամի մոտ շփման գծի մոնիթորինգին։ Բաքվում համանախագահները հանդիպել են հակամարտությունից տուժած ադրբեջանական համայնքի ներկայացուցիչների հետ։ Նրանք իրավիճակը քննարկել են նաեւ ԿԽՄԿ-ի եւ փախստականների հարցերով ՄԱԿ գերագույն հանձնակատարի ներկայացուցիչների հետ։
Համանախագահների հետ հանդիպման ընթացքում երկու երկրների ղեկավարներն էլ հաստատել են, որ բռնությունների մակարդակը զգալիորեն նվազել է, քանի որ Դուշանբեում հաստատել են լարվածության թուլացմանն իրենց տրամադրվածությունը։ Խորհրդակցությունների ընթացքում համանախագահները լրացուցիչ տեղեկատվություն են ստացել Դուշանբեում պայմանավորվածությունների վերաբերյալ, այդ թվում՝ ուղիղ կապի մասին։ Համանախագահները ողջունել են այդ իրադարձությունները՝ կառուցողական միջոցառումների բարեխիղճ իրականացման համար բարձր գնահատականներ տալով կողմերին, եւ աջակցություն են հայտնել երկխոսությունը շարունակելու առաջնորդների պատրաստակամությանը։
Համանախագահներն ընդգծել են ղարաբաղյան հակամարտության կարգավորման ակտիվ բանակցությունների համար վստահության մթնոլորտի պահպանման կարեւորությունը։
Արտգործնախարարները պայմանավորվել են մինչեւ տարվա վերջը մեկ անգամ եւս հանդիպել։
Համանախագահները շուտով կմեկնեն Վիեննա, որպեսզի իրավիճակը ներկայացնեն ԵԱՀԿ Մշտական խորհրդին եւ Մինսկի խմբի անդամներին։
