Եվրամիությունը, ինչպես նաեւ Գերմանիան, Ֆրանսիան եւ Մեծ Բրիտանիան ափսոսանք են հայտնել նոր պատժամիջոցների կապակցությամբ, որոնք ԱՄՆ-ն առաջիկայում կկիրառի Իրանի հանդեպ, հաղորդում է DW-ն:
«Մենք խորապես ցավում ենք միջուկային գործարքից Վաշինգթոնի դուրս գալու արդյունքում ԱՄՆ-ի նոր պատժամիջոցների վերսկսման կապակցությամբ», - ասվում է նոյեմբերի 2-ին հրապարակված եվրոպական երկրների ընդհանուր հայտարարության մեջ: Փաստաթուղթը ստորագրվել է եվրոպական դիվանագիտության ղեկավար Ֆեդերիկա Մոգերինիի, երեք արտաքին գործերի նախարարների`Ֆրանսիայի` Ժան-Իվ Լե Դրիանի, Մեծ Բրիտանիայի` Ջերեմի Հանթի, ե Գերմանիայի` Հայկո Մաասի, եւ Գերմանիայի ֆինանսների նախարար Օլաֆ Շտոլցի եւ Մեծ Բրիտանիայի ֆինանսների նախարար Ֆիլիպ Հեմմոնդի կողմից:
Միջուկային համաձայնագիրը «միջուկային զենքի չտարածման եւ բազմակողմ դիվանագիտության գլոբալ ճարտարապետության կարեւորագույն տարրն է»: Փաստաթուղթը վճռորոշ նշանակություն ունի Եվրոպայի, տարածաշրջանի եւ ողջ աշխարհի անվտանգության համար, ասվում է համատեղ հայտարարության մեջ, որի համաձայն ստորագրող կողմերը կցանկանան պահպանել դրա դրույթները: Ռուսաստանը, Չինաստանը եւ այլ շահագրգիռ երկրները կարող են մասնակցել դրանց իրականացմանը:
Առաջիկա երկուշաբթի՝ նոյեմբերի 5-ին, սպասվում է Իրանի դեմ նոր ամերիկյան պատժամիջոցների վերսկսումը: Դրանք անդրադառնալու են հիմնականում նավթային եւ բանկային ոլորտներին:
ԱՄՆ-ն արդեն հայտարարել է, որ բացառություն կանի ութ երկրների համար, սակայն դրանց թվում չկան ԵՄ երկրներ: ԱՄՆ-ի պատժամիջոցները նախկինում արդեն գործել են, բայց 2015-ին դրանք չեղարկվել էին:
