Ռուսաստանի վարչապետ Դմիտրի Մեդվեդեւը հաստատել է հեռախոսահամարով մեսենջերների օգտատերերին նույնականացնելու կանոնները։ Փաստաթուղթը ուժի մեջ կմտնի պաշտոնական հրապարակումից 180 օր հետո՝ տեղեկացնում է Meduza-ն։
Ըստ փաստաթղթի՝ մեսենջերների աշխատակիցները պետք է կապի օպերատորների միջոցով ստուգեն այն հեռախոսահամարները, որոնցով գրանցվում են օգտատերերը։ Այս կերպ մարդու անձի ստուգումը պետք է կատարվի 20 րոպեի ընթացքում։ Օգտատերը ստուգումը չի անցնի, եթե օպերատորը չպատասխանի կամ նրա մասին տեղեկություններ չգտնի։
Իր մասին տեղեկությունները կամ հեռախոսահամարը փոխելու դեպքում օգտատերը պետք է կրկին նույնականացում անցնի։
Կառավարությունը մեսենջերներին պարտավորեցրել է արգելել ստուգում չանցած օգտատերերին հաղորդագրություն ուղարկել։
2018թ․ հունվարի 1-ից Ռուսաստանում ուժի մեջ է մտել հեռախոսահամարով օգտատերերին նույնականացնելու մասին օրենքը, որը սակայն չէր գործում, քանի որ չկային օրենքից բխող որոշումներ։
Մեսենջերներում անանուն մնալը արգելող օրենքի խախտման համար իրավաբանական անձինք կարող են տուգանվել մինչեւ 1 մլն ռուբլով։
