Չնայած Մոսկվայի հետ լարված հարաբերություններին՝ ՆԱՏՕ-ի գլխավոր քարտուղար Յենս Սթոլթենբերգը արտահայտվել է Ռուսաստանի հետ երկխոսության օգտին։ «Մենք ուզում ենք Ռուսաստանի հետ ոչ թե հակամարտություն, այլ երկխոսություն»,- Neue Osnabrücker Zeitung թերթին նտված հարցազրույցում ասել է Սթոլթենբերգը։
Միաժամանակ, ՆԱՏՕ-ի ղեկավարն ասել է, թե Արեւմուտքին «չի կարելի միամիտ լինել», եւ պետք է «Մոսկվայի առաջ համախմբված լինել»։ Նա նաեւ հավելել է, որ չնայած քաղաքական լարվածությանը՝ Արեւմուտքը կարողանում է Ռուսաստանի հետ խնդիրների լուծումներ գտնել։
Ըստ Սթոլթենբերգի՝ աշխարհի համար ամենավտանգավորը հիմա միջազգային քաղաքականության անկանխատեսելիությունն է։ Նա նաեւ ասել է, որ «սառը պատերազմի» տարիներին Արեւմուտքն ու Արեւելքը թշնամիներ էին, սակայն այսօր «մարտահրավերներն ավելի համակարգված են»։ «Եվրոպական պատմությունից մենք բոլորս գիտենք, որ պատերազմի ծախսերն ավելի թանկ են, քան խաղաղության գինը»,- ամփոփել է գլխավոր քարտուղարը։