Հայաստանի տնտեսության մեջ լուրջ փոփոխությունների համար հարկավոր է հիմնավորապես վերանայել Հարկային օրենսգիրքը, Աշխատանքային օրենսգիրքը, ինչպես նաեւ «Սնանկության մասին» օրենքը: Այս մասին նոյեմբերի 7-ին լրագրողների հետ հանդիպման ժամանակ ասաց Հայաստանի գործատուների միության նախագահ Գագիկ Մակարյանը:
«Եթե Հարկային օրենսգրքի դրույթները չփոխվեն, ապա ձեռներեցներից եւ գործարարներից շատերի համար ներկայիս վիճակը կարող է ավելի պակաս ձեռնտու լինել, քան մինչ հեղափոխությունը եղածը»,- շեշտեց փորձագետը:
Գագիկ Մակարյանի խոսքով՝ օրենսդրական բարեփոխումներից բացի, անհրաժեշտ է լուծել տնտեսության մենեջմենթի հարցերը:
«Սա առանձնապես արդիական է ներդրումների հնարավոր աճի ֆոնին, երբ պետությունը պետք է դրանց զտում անցկացնի եւ տնտեսական քաղաքականությունը վարի երկրի շահերի շրջանակում»,- ասաց Գագիկ Մակարյանը:
Փորձագետը նշեց, որ ներմուծման եւ ապրանքների փոխադրման նույն վատ կազմակերպումը կարող է գնաճի հանգեցնել:
Անդրադառնալով տնտեսության առաջնային ոլորտին՝ փորձագետը ընդգծեց, որ անհրաժեշտ է շեշտադրում կատարել բարձր տեխնոլոգիաների զարգացման վրա:
«Այսօր բարձր տեխնոլոգիաների ոլորտի զարգացումը մեր երկրի համար հատուկ դեր ունի, նաեւ այն պատճառով, որ Հայաստանը մեծամասամբ դուրս է մնում տարածաշրջանային նախագծերից, մասնավորապես՝ տրանսպորտային, ինչը կարող էր զգալիորեն մեծացնել հարկային մուտքերը»,- եզրափակեց Գագիկ Մակարյանը: