Դեռ հստակ որոշում չկա։ Այս մասին այսօր՝ նոյեմբերի 7-ին, ԱԺ–ում լրագրողների հետ զրույցում ասաց Շիրակի մարզպետ Կարեն Սարուխանյանը՝ մեկնաբանելով ռեյթինգային ընտրացուցակով իր առաջադրվելու մասին հարցին։
«Մեր կուսակցության ռեյտինգային թեկնածուների ցանկը ընտրում է կուսակցության վարչությունը, այս պահին դեռ որոշում չկա, քննարկումների փուլում ենք»,–նշեց մարզպետը։
Մարզպետի կարծիքով՝ ՔՊ–ն Շիրակի մարզում 15 ռեյթինգային թեկնածու է ունենալու։
Նա նաեւ բարձր է գանահատում ՔՊ–ի շանսերը մարզում. «Այս ընթացքում աշխատանքներ են կատարվել, վարկանիշը բավականին բարձր է»։
Մարզպետը ներկայացրեց նաեւ այս ընթացքում կատարված աշխատանքը, խոսեց լուծված խնդիրների մասին. «2017 թվականի համեմատ 2018 թվականին մարզում 600 աշխատատեղ է ավելացել։ Բողոքներ կան, հիմնականում բողոքում են անօթեւանների խնդիրների հետ կապված, այս պահին կառավարության հետ քննարկումների փուլում ենք, թե ինչ լուծումներ կարող ենք տալ»։
Կարեն Սարուխանյանը, սակայն, չի կարծում, որ անօթեւանների խնդիրը կարող է ազդել ՔՊ–ի վարկանիշի վրա, որովհետեւ «մարդիկ հասկանում են, որ վաղուց է եկել այդ խնդիրը»։
Շիրակի մարզում Ֆելիքս Ցոլակյանի առաջադրվելու մասով նա շեշտեց, որ վերջինս մեծ հեղինակություն եւ հարգանք ունի մարզում, որն էլ, իր կարծիքով, կապացուցվի ընտրությունների ժամանակ, իսկ խոսակցությունների մասով, թե վարչական ռեսուրս է կիրառվում Ցոլակյանի համար ձայներ բերելու նպատակով, մարզպետը խնդրեց այդ հարցով դիմել համապատասխան մարմիններին. «Վստահ եմ, որ չի օգտագործվի վարչական ռեսուրս, բայց ընթացքում կտեսնենք, քարոզարշավը կսկսի, կտեսնենք ինչ է կատարվում։ Հետեւողական ենք լինելու, որ չկիրառվի»։
Մարզպետը նշեց, որ ցանկություն ունի նաեւ ընտրություններից հետո էլ պաշտոնավարել, քանի որ դեռ անելիքներ ունի, իսկ քաղաքացիների շրջանում ինքը մեծ վստահություն չունի։ «Շիրակի մարզպետի դուռը ամեն օր բաց է քաղաքացիների առաջ»,–եզրափակեց նա՝ մատնանշելով, որ նախորդ մարզպետների ժամանակ քաղաքացիների ընդունելությունը եղել է ոչ թե ամեն օր, այլ մեկ կամ երկու շաբաթը մեկ։
