Թիմից առաջարկ է եղել, որ ես ռեյտինգային ընտրակարգով առաջադրվեմ առաջիկա ընտրություններին եւ ես համաձայնել եմ: Այս մասին, այսօր՝ նոյեմբերի 7-ին, ԱԺ-ում լրագրողների հետ զրույցում նշեց Վայոց ձորի մարզպետ Տրդատ Սարգսյանը, ով առաջադրվել է հենց իր մարզում:
Նա չի կարծում, որ իրենց մարզում կարող է կրկնվել Կապանի օրինակը, երբ ՔՊ-ի մրցակից թեկնածուն կարողացավ հաղթել ընտրություններում. «Քաղաքացին գիտակցում է իր քվեի արժեքը: Կապանը այլ խնդիր է, Վայոց Ձորի մարզում քրեաօլիգարխիա չկա, թաղային հեղինակություններ, որպես այդպիսին, չկան: Ամեն ինչ մրցակցային կլինի»,-ասաց նա:
Դիտարկմանը, թե Կապանում կա՞ր քրեաօլիգարխիա, Տրդատ Սարգսյանն արձագանքեց, որ չի կարող ասել, այդպիսի տեսակետներ են հնչել:
Ինչ վերաբերում է նրան, որ Վայոց Ձորում ԲՀԿ-ն ամուր դիրքեր ունի, նախկին մարզպետ Սերգեյ Բագրատյանը եւս կարող է առաջադրվել, Տրդատ Սարգսյանն ասաց. «Կմրցենք, վերջնական արդյունքը ցույց կտա ԲՀԿ-ի ու ՔՊ-ի շանսերը»:
Մարզպետը նաեւ վստահեցրեց, որ իրենց կողմից վարչական ռեսուրս չի կիրառվելու եւ քաղաքացու քվեի համար կպայքարեն, որի արդյունքները պարզ կդառնան ընտրություններից հետո։
