Տարբեր կոչումներ ունեցող զինծառայողների կողմից եղել են բացթողումներ։ Այս մասին այսօր՝ նոյեմբերի 8–ին, Կառավարության նիստից հետո լրագրողների հետ զրույցում ասաց պաշտպանության փոխնախարար Գաբրիել Բալայանը՝ անդրադառնալով նախօրեին տեղի ունեցած ողբերգական վթարին։
«Ծառայողական քննությանը զուգահեռ իրականացվում է նախաքննություն, հետեւաբար, այս փուլում մեկնաբանություն անելը ճիշտ չէ։ Իրոք եղել են բացթողումներ, տարբեր կոչումներ ունեցող զինծառայողների կողմից եղել են բացթողումներ։ Հիմա հատուկ հանձնախումբն աշխատում է այդ ուղղությամբ, ներգրավված են բոլոր ուժերը, որ նմանատիպ աննախադեպ իրադարձություն այլեւս տեղի չունենա։ Հնարավոր է նաեւ որոշակի անսարքություններ ի հայտ գան»,– ասաց Գաբրիել Բալայանը։
Ավելի վաղ NEWS.am-ը հայտնել էր, որ նոյեմբերի 7–ին ժամը 13.00-ի սահմաններում, N զորամասի հաշվեկշռում գտնվող «Կամազ» մակնիշի ավտոմեքենան Որոտան-Խնձորեսկ ավտոճանապարհի 5-րդ կմ հատվածում դուրս է եկել ճանապարհի երթեւեկելի մասից եւ գլորվել ձորը, ինչի հետեւանքով ավտոմեքենայի վարորդ, պարտադիր ժամկետային զինծառայող, շարքային Էդգար Արմենի Հունանյանը եւ ավտոմեքենայի թափքում գտնվող պարտադիր ժամկետային զինծառայողներ, շարքայիններ Հայրապետ Վոլոդյայի Նաիրյանը, Հրանտ Արայի Գասպարյանը եւ Դավիթ Բենիամինի Մելքոնյանը ստացած մարմնական վնասվածքներից մահացել են: Վթարի հետեւանքով բեռնատարի թափքում գտնվող զինծառայողներից 8–ը տարբեր աստիճանի մարմնական վնասվածքներով տեղափոխվել են Սիսիանի զինվորական հոսպիտալ եւ «Գորիս» բժշկական կենտրոն:
Նշենք, որ վթարի պահին բեռնատարում եղել է 21 զինծառայող, որից 19-ը՝ թափքում: Դեպքի կապակցությամբ հարուցվել է քրեական գործ Քրեական օրենսգրքի 377-րդ հոդվածի 3-րդ մասի հատկանիշներով։
