Ղազախստանի նախագահ Նուրսուլթան Նազարբաեւը բացել է ՀԱՊԿ Հավաքական անվտանգության խորհրդի նիստը, հայտնում է Sputnik-Ղազախստանը։
Նեղ կազմով հանդիպման սկզբում նա նշել է, որ նստաշրջանի սկզբում կլսեն ՀԱՊԿ քարտուղարության տեղեկությունը, 2018 թվականին Ղազախստանի նախագահության արդյունքները կամփոփվեն, ինչպես նաև կքննարկվեն երկրների հավաքական անվտանգության արդիական հարցեր։
«Օրակարգի հաստատումից հետո առաջարկում եմ մտքեր փոխանակել այբբենական կարգով։ Նեղ կազմով նիստը նախատեսված է 1.5 ժամ, սակայն մենք կարող ենք ավելի արագ ավարտել։ Խնդրում եմ ելույթով հանդես գալ հնարավորինս կանոնակարգի համաձայն»,–ասել է Նազարբաևը։
Նա հավելել է, որ պատվիրակների ելույթներին հատկացվում է 10 րոպե։ Սակայն, ինչպես ցույց է տալիս միջազգային պրակտիկան, կարելի է նաև 5 րոպեում տեղավորվել, գտնում է նախագահը։
Աշխատանքը կշարունակվի նաև ընդլայնված կազմով լրագրողների ներկայությամբ:
«Ընդլայնված կազմով նիստին նախատեսվում է 1.5 ժամ, սակայն մենք կարող ենք ավելի արագ ավարտել, քանի որ բոլոր հարցերը պատվիրակությունների հետ համաձայնեցված են։ Նիստի ավարտին տեղի կունենա հանդիպում մամուլի հետ։ Եթե դեմ չեք, ապա ես և Վալերի Սեմերիկովը կհանդիպենք լրագրողների հետ»,–հավելել է Նազարբաևը։