ՀԱՊԿ անդամ-երկրների ղեկավարները անհրաժեշտ են համարում տեղեկատվական անվտանգության ոլորտում հավաքական ջանքերի ուժգնացումը։ Այդ մասին ասվում է ՀԱՊԿ անդամ-երկրների ղեկավարների հռչակագրի մեջ, որն ընդունվել է Աստանայում Հավաքական անվտանգության կազմակերպության խորհրդի նիստում։
Ղեկավարները նշել են, որ հատուկ նշանակություն են տալիս տեղեկատվական հարթակում հանրային կանոնների, նորմերի եւ պատասխանատու վարքագծի սկզբունքների մշակմանն ու անհապաղ ընդունմանը՝ ՄԱԿ-ի հովանու ներքո։ «Հաստատակամորեն հանդես ենք գալիս տեղեկատվական ոլորտում հակամարտությունները կանխելու, տեղեկատվական սպառազինությունների մրցավազք թույլ չտալու, տեղեկատվական հարթակում ուժ չգործադրելու, տեղեկատվական-կոմունիկացիոն տեխնոլոգիաները միայն խաղաղ նպատակներով օգտագործելու օգտին»,- ասվում է հռչակագրում։