Մելբուռնի կենտրոնում տեղի ունեցած դեպքը ոստիկանությունը որպես ահաբեկչական գործողություն է որակել:
Վիկտորիա նահանգի ոստիկանության գլխավոր կոմիսար Գրեմ Էշթոնը ուրբաթ մամուլի ասուլիսի ժամանակ հայտնել է, որ իրավապահ մարմինները տեղեկություններ ունեն, որ հարձակվողը պայթուցիկ սարքը նետել է ավտոմեքենայի պատուհանից ներս, որը քաղաքի կենտրոնում այրվել է, գրում է ՏԱՍՍ-ը:
«Մենք ունենք ականատես, որը տեսել է, ինչպես է հարձակվողը պայթուցիկ սարքը նետում ավտոմեքենայի պատուհանից ներս: Կան նաեւ վկաներ, որոնք պնդում են, որ տղամարդը կանխամտածված մեքենան ուղղել է դեպի շենքը, որից հետ այն պայթել է, - հաղորդել է նա, - մենք կարող ենք հանցագործությունը որպես ահաբեկչական գործողություն որակել»:
Նշվում է, որ ենթադրյալ հանցագործը 1990-ականներին Ավստրալիա է տեղափոխվել Սոմալիից:
Ոստիկանությունը ժամանել է դեպքի վայր այն հաղորդումից հետո, որ մեքենան հարվածել է առեւտրի կենտրոնի շենքին եւ այրվել: Դրանից հետո դանակով զինված տղամարդը հարձակվել է ժամանած իրավապահների վրա՝ «Ալահ Աքբար» գոչելով:
Հարձակման արդյունքում երեք անցորդ վիրավորվել է, որոնցից մեկն ավելի ուշ մահացել է, իսկ երկուսը դանակից ստացված վնասվածքներով հասպիտալացվել են: Հարձակման ընթացքում հանցագործը ոստիկանների կողմից հրազենային վնասվածք է ստացել եւ ավելի ուշ հիվանդանոցում մահացել:
Մելբուռնում անվտանգության միջոցառումներն ուժեղացվել են, դեպքի վայրում եւ հարակից տարածքներում աշխատում են սակրավորները: Դեպքի հետաքննությունը շարունակվում է: