Նյու Յորքի աճուրդներից մեկում վաճառքի կհանվի Ստեֆան Ցվայգի «Այրող գաղտնիքը» ստեղծագործության հիման վրա գրված Սթենլի Կուբրիկի սցենարը։ Տեքստը կորած էր համարվում եւ գտնվել է միայն 2018 թվականի հուլիսին Բրիտանիայում, հայտնում է Vesti-ն՝ վկայակոչելով Dazed-ն։
Մեկնարկային գինը 20 հազար դոլար է, աճուրդը կկայանա նոյեմբերի 20-ին։ Սցենարը շուրջ 100 էջ է։ Աճուրդի ներկայացուցիչները նշում են, որ տեքստն ամբողջությամբ ավարտված է եւ ցանկության դեպքում կարելի է այդ սցենարի հիման վրա ֆիլմ նկարահանել։
Կուբրիկը սցենարն ավարտել է 1956 թվականի հոկտեմբերի 24-ին։
Ցվայգի «Այրող գաղտնիքը» ստեղծագործությունը պատմում է տղամարդու մասին, որը փորձում է գրավել ամուսնացած կնոջը՝ ընկերանալով նրա 10-ամյա տղայի հետ։