Նիկոլ Փաշինյանը հնարավոր է շատ ուզենա եղած քաղաքական ուժերից որեւէ մեկին մի փոքր ավելի թաքուն կամ բացահայտ սատարել, որ ունենա իրեն ավելի հարմար ընդդիմություն։ Այս մասին, այսօր՝ նոյեմբերի 11-ին, ՀՀԿ խորհրդի նիստից հետո լրագրողների հետ զրույցում նշեց պաշտպանության նախկին նախարար Վիգեն Սարգսյանը։
Նրա խոսքով, հարցը հիմա մի բանի մասին է. «Մենք ԱԺ-ում ունենալու են երկու բեւեռ, թե մեկ բեւեռ։ «Եթե Նիկոլ Փաշինյանն ազնիվ է նոր Հայաստան կառուցելու իր ձգտման մեջ, ինքը մենակ մնալով քվեախցիկում, քվեարկելու է ՀՀԿ-ի օգտին։ Նա այլընտրանք պետք է որ չտեսնի, որպես բանավեճի գործընկեր ապագա խորհրդարանում։ Եթե նա դա չանի, ուրեմն ուզում է ունենալ գրպանային ընդդիմություն»,-ասաց Վիգեն Սարգսյանը։
Նրա խոսքով, ՀՀԿ-ի իշխանության օրոք էլ եղել է դեպքեր, որ երբ ՀՀԿ-ն գնացել է ընտրությունների, փորձել է հասկանալ, թե ով կարող է լինել ընդդիմություն. «Բայց ՀՀԿ-ն վերջին ընտրություններում չի ունեցել այնքան բարձր վարկանիշ, որ իր տոկոսից փորձի մեկ ուրիշին ձայն տալ։ Մենք փորձել ենք, որ մեր տոկոսը բարձրանա եւ պարոն Փաշինյանի տոկոսին մոտենա»,-ասաց նա։