Սերժ Սարգսյանը չի մասնակցելու ընտրություններին, ցուցակում չի լինելու նաեւ Կարեն Կարապետյանը։ Այս մասին, այսօր՝ նոյեմբերի 11-ին, ՀՀԿ խորհրդի նիստից հետո լրագրողների հետ զրույցում նշեց պաշտպանության նախկին նախարար Վիգեն Սարգսյանը։
Նա հայտարարեց, որ ՀՀԿ-ի ցուցակն արդեն կա, ուղղակի չեն հրապարակում։ Հարցին, թե ինչու չեն հրապարակում, Վիգեն Սարգսյանը պատասխանեց. «Որովհետեւ դա ֆիրմայի գաղտնիքն է, որ հոբելյարը ժամանակից շուտ չուրախանա»։
Վիգեն Սարգսյանն անդրադարձավ նաեւ ՀՀԿ նախագահի ընտրության հարցին, նշելով, ր ՀՀԿ նախագահի հարցը լուծում է համագումարը. «Մենք 2019-ի գարնանը այսպես թե այնպես պետք է ունենայինք համագումար, որտեղ պետք է ձեւավորվի կուսակցության ղեկավար կազմը։ Կարծում եմ՝ այս ընտրություններն առաջ բերելու նպատակներից մեկը նաեւ մեր կուսակցությանը նորմալ համագումար կազմակերպելու հնարավորությունից զրկելն էր տակտիկական առումով։
Մենք ունեինք հնարավորություն անել ձեւական համագումար, ինչպես անում են շատ կուսակցություններ, բայց ես կարծում եմ, որ համագումարը չափազանց կարեւոր գործիք է։ Մեր սխալներից մեկը ժամանակի մեջ նաեւ եղել է այն, որ կորցրել ենք ուղիղ կապը մեր կուսակցական գործընկերների հետ։ Դրա համար որոշեցինք նորմալ անցկացնել համագումար ընտրություններից հետո»։
