Իշխանություն կամ ընդդիմություն լինելը քաղաքական ուժերի ցանկությամբ չէ, այլ ժողովրդի տված քվեով: Այս մասին, այսօր՝ նոյեմբերի 12-ին, ԱԺ-ում լրագրողների հետ զրույցում նշեց ԱԺ «Ծառուկյան» խմբակցության պատագմավոր Նաիրա Զոհրաբյանը:
Նրա խոսքով, դեկտեմբերի 9-ին կայանալիք ԱԺ արտահերթ ընտրություններում ժողովուրդն ում ինչ քվե տվեց, դրանից էլ պարզ կլինի ով է իշխանություն, ով՝ ընդդիմություն. «Եթե քաղաքական ռեալ պոլիտիկը ձեւավորվեր հայտարարություններով ու ցանկություններով, մենք բացարձակապես այլ իրականություն կունենայինք: Ես չեմ առաջնորդվում կոֆեի բաժակի մրուրով, թե այդ մրուրի հետագիծն ինչ ցույց կտա: Ինձ համար քաղաքականությունը, որքան էլ շատերն այն համեմատում են այլ մասնագիտություններից հետ, նախեւառաջ ազնվություն է: Քաղաքական գործիչը պետք է ասի այն, ինչ մտածում է»,-ասաց Զոհրաբյանը՝ հավելելով, որ իրենք գնում են արդար մրցապայքարի:
Նա ընդգծեց, որ ԲՀԿ-ն ներկայացնելու է շատ ուժեղ ծրագիր եւ իրենց զրուցակիցը լինելու է ՀՀ քաղաքացին, որին էլ ներկայացնելու են իրենց ծրագրերը:
«Մենք քաղաքական կոռեկտության կոչ ենք անում բոլորին: Ով կխախտի քաղաքական կոռեկտությունը, բնականաբար, համարժեք պատասխան կստանա»,-ասաց Նաիրա Զոհրաբյանը:
Դիտարկմանը, որ ինքնառաջադրվում է Սյունիքի եւ Վայոց Ձորի մարզերում, եւ կա տեսակետ, որ իրեն աքսորում են Երեւանից, Նաիրա Զոհաբյանը նշեց. «Այդ տեսակետը սխալ է: Կայացած քաղաքական գործիչը պետք է վստահության քվե ունենա ոչ միայն այն բակում, որտեղ ծնվել, մեծացել է, այլ ցանկացած բնակավայրում, որտեղ կորոշի իր կուսակցությունը»:
Նա նաեւ խոստացավ, որ չի լինելու «գոստրոլյոր» պատգամավոր, ինչպես տարիներ շարունակ ունեցել են այդ մարզերը, բացառությամբ 1-2 պատգամավորի: