Զրպարտանք է ՀՀԿ-ի կողմից, թե Նիկոլ Փաշինյանը հրահրել է «Մարտի 1»-ը: Այս մասին, այսօր՝ նոյեմբերի 12-ին, ԱԺ-ում լրագրողների հետ զրույցում նշեց «Ելք» խմբակցության պատգամավոր Հրաչյա Հակոբյանը՝ անդրադառնալով նախօրեին ՀՀԿ-ի տարածած բանաձեւին, որտեղ կա նման պնդում:
«Մարտի 1»-ը գրեթե բաց է բոլորի համար, բացի նրանից, որ կոնկրետ հանցագործություն կատարած անձինք չեն հայտնաբերվել: Դրանք ՀՀԿ-ի նախընտրական հերթական մանյովրներն են: Նիկոլ Փաշինյանը երկու տարի պատիժ է կրել, իսկ ուր են այն մարդիկ, որոնք կրակել են ժողովրդի վրա: Ինչու ՀՀԿ-ի իշխանության օրոք որեւէ մեկը պատասխանատվության չենթարկվեց:
Թող փաստեր հրապարակեն, թե ինչով է Նիկոլ Փաշինյանը մեղսակից «Մարտի 1»-ին: Բայց թող նաեւ պատասխանեն, թե ինչու չբացահայտվեցին «Մարտի 1»-ի կազմակերպիչները, կատարողները»,-հայտարարեց նա:
Նշենք, որ ՀՀԿ տարածած բանաձեւի տեքստում նշվում է. «Հենց Նիկոլ Փաշինյանն է եղել 2008թ. մարտի 1-ին տեղի ունեցած բախումների հրահրողներից մեկը, որոնց արդյունքում եղան մարդկային զոհեր»: