Ես հույս չունեմ, որ ՀՀԿ-ն ընդհանրապես կլինի խորհրդարանում: Այս մասին, այսօր՝ նոյեմբերի 12-ին, ԱԺ-ում լրագրողների հետ զրույցում նշեց «Ելք» խմբակցության պատգամավոր Հրաչյա Հակոբյանը:
Դիտարկմանը, որ «Ելք» խմբակցության պատգամավոր Արամ Սարգսյանը հայտարարել էր, որ ՀՀԿ-ն եւ ՔՊ-ն կարող են դաշինք կազմել, քանի որ շատ հարցերում նրանց տեսակետները մոտ են, Հրաչյա Հակոբյանը բացառեց նման հնարավորությունը՝ նշելով. «Դեռ ՀՀԿ-ն պետք է հայտնվի խորհրդարանում, որ մի հատ էլ նման հարց առաջանա, որ կոալիցիա կազմեն իշխանության հետ կամ չկազմեն: Միանշանակ կոալիցիա չեն կազմի, դա պարզապես ծիծաղելի է»:
Այսինքն ՀՀԿ-ն կարող է չհաղթահարե՞լ անցողիկ շեմը հարցին էլ արձագանքեց. «Այո, բնականաբար: Եթե ռեբրենդինգ անեին, եթե ՀՀԿ հապավումն իրենցից պոկեին, իրենց դաջված չլիներ ՀՀԿ, միգուցե այնտեղ կան մարդիկ, որ արժեր, որ լինեին խորհրդարանում, գուցե հայտնվեին ԱԺ-ում, բայց ՀՀԿ անվան տակ բացառում եմ»:
Լրագրողները հիշեցրին, որ ՀՀԿ-ն նշում է, որ նոր իշխանությունը տնտեսական թռիչք էր խոստանում, բայց այս 6 ամիսներին գնաճ է գրանցվել, կրճատվել են օտարերկրյա ներդրումները, գործարարներն ապրիորի դիտվում են հանցագործներ: Ի պատասխան Հրաչյա Հակոբյանն ասաց. «Մենք դաշտն ենք մաքրում: Մենք դեռ իրենց 20 տարվա աղբը փորձում ենք հասկանալ, սա ինչ է: Փորձում ենք հասկանալ, թե ինչու է ՀՀԿ-ն ատամի խոզանակը դրել կոշիկի խոզանակի կողքը, բերեք տարանջատենք մեկը մյուսից»:
