ՌԴ Քննչական կոմիտեի Սանկտ Պետերբուրգի վարչությունը վերսկսել է երգիչ եւ երգերի հեղինակ Իգոր Տալկովի սպանության քրեական գործի քննությունը՝ տեղեկացնում է Meduza-ն։
Հետաքննությունը բավարարել է երգչի այրու՝ Տատյանա Տալկովայի իրեն տուժած ճանաչելու մասին միջնորդությունը։ Երգչի մայրը, ով գործով տուժած էր ճանաչվել, մահացել է։
Տուժածի կարգավիճակով Տատյանա Տալկովային հարցաքննելուց հետո նրան թույլ կտան ծանոթանալ քրեական գործի նյութերին։
Հիշեցնենք, որ Իգոր Տալկովը սպանվել էր 1991թ․ հոկտեմբերին՝ Պետերբուրգի «Հոբելյանական» սպորտային պալատում տեղի ունեցած փոխհրաձգության հետեւանքով։ Հաջորդ տարի երգչի համերգային տնօրեն Վալերի Շլյաֆմանին անզգուշությամբ սպանելու մեղադրանք էր առաջադրվել։ Այդ ժամանակ նա արդեն Իսրայել էր մեկնել։ 1993թ․ գործի քննությունը դադարեցվել էր։