Հայաստանում էկո-թրենդը զարգանալու բոլոր նախադրյալներն ունի: Նոյեմբերի 14-ին լրագրողների հետ հանդիպման ժամանակ այսպիսի կարծիք հայտնեց SHTIGEN ընկերության հիմնադիր-տնօրեն Հայկ Շեկյանը:
Նա նշեց, որ բիզնեսի համար կարեւոր է, որ արեւային տեխնոլոգիաների առաջընթացը կայուն բնույթ ունենա, այլ ոչ թե խանդավառության հարց դառնա:
«Հայաստանում հելիոտեխնոլոգիայի կայուն զարգացման համար բավական չէ պարզապես դրամաշնորհ ստանալ, անհրաժեշտ է, որպեսզի դրանք շահութաբեր լինեն, իսկ որտեղ շահույթ կա, այնտեղ կա նաեւ զարգացման կայունություն»,- նշեց Շեկյանը:
Նա ասաց, որ այս իմաստով Հայաստանում էկո-թրենդի, որպես կայուն ուղղության, զարգացման համար բոլոր նախադրյալները կան, եւ լուրջ բիզնեսների առկայությունը դրա մասին է վկայում:
«Նվազագույնը առաջիկա 5 տարիներին ես էկո-թրենդի նոր ուղղություններ, շուկայի նոր հատվածներ եւ վերականգնվող էներգիայի աղբյուրների զարգացման ավելի բարձր տեմպեր եմ կանխատեսում»,- եզրափակեց SHTIGEN-ի տնօրենը:
«Հայաստանի էներգետիկ շաբաթ-2018»-ը կտեւի նոյեմբերի 14-ից 16-ը: Կազմակերպիչներն են՝ Հայաստանի վերականգնվող էներգիայի եւ էներգաարդյունավետության հիմնադրամը եւ Invest In Network-ը: Միջոցառմանը մասնակցում են արտասահմանյան եւ տեղական պետական կառույցների, մասնավոր հատվածի, միջազգային կազմակերպությունների, ներդրողների, դիվանագիտական կորպուսների, փորձագետների 300-ից ավելի ներկայացուցիչներ:
