«Թիրախավորած կպայքարենք այս պահին միայն ՀՀԿ–ի դեմ, իսկ մյուս քաղաքական ուժերի դեմ գաղափարական հենքի վրա կտանենք պայքարը»։ Այս մասին NEWS.am–ի հետ հարցազրույցում ասաց ԱԺ «Ելք» խմբակցության պատգամավոր, ՔՊ վարչության անդամ Հովիկ Աղազարյանը։
Այս թիրախավորումը Աղազարյանը բացատրեց նրանով, որ ՀՀԿ–ն նպաստել է «ռեյտինգային» ընտրակարգի պահպանմանը, քանի որ այդ մեթոդով հավակնում է հաղթահարել 5 տոկոսի շեմը։
ԲՀԿ–ի մասին Հովիկ Աղազարյանը վերապահումով խոսեց. «Իրենց պահվածքով չեն եղել ծրագրային, բեւեռային ընդդիմություն, շատ ժամանակ կողմ են եղել իշխանության օրինագծերին։ «Այլընտրանք» եզրույթը նրանք հորինեցին, որ համապատասխանեցնեն իրենց կեցվածքին»։
Ասաց, որ ոչ մի լուրջ քաղաքական ուժի ձեռնտու չէ գրպանային ընդդիմություն ունենալ։
«Լուսավոր Հայաստանին» ու «Մենք» դաշինքին Աղազարյանը դիտարկում է իբրեւ ռացիոնալ ընդդիմություն։
Նա կանխատեսում է, որ նոր խորհրդարան կանցնեն «Իմ քայլը», ԲՀԿ–ն, ՀՀԿ–ն, նաև՝ ՀՅԴ–ն, «Լուսավոր Հայաստանը», «Մենքը» եւ «Սասնա ծռերը»։
«Իմ քայլը» դաշինքը քարոզարշավն սկսելու է նոյեմբերի 26–ից։ Հավանական է Երեւանից սկսի, շարունակի դեպի մարզերը։ Քննարկվել է նաեւ Սյունիքից սկսելու եւ այլ մարզերով դեպի Երեւան շարժվելու տարբերակը։
Հարցազրույցի մանրամասները՝ տեսանյութում։