Ազգային ժողովում այսօր՝ նոյեմբերի 15–ին, շարունակվում են հերթական նիստերը։ Մասնավորապես, այսօր քվեարկության կդրվեն նախորդ օրը քննարկված օրինագծերը եւ կշարունակեն մնացած օրինագծերի քննարկումը: Մասնավորապես, օրակարգում է «Գովազդի մասին» օրենքում փոփոխությունների նախագիծը, որի հեղինակը «Ելք» խմբակցության պատգամավոր Հրաչյա Հակոբյանն է:

Հիշեցնենք, որ երեկ ԱԺ-ում ավարտվեցին 2019թ.–ի պետական բյուջեի նախագծի քննարկումները: Բյուջեի նախագիծն ընդունելու համար, ամենայն հավանականությամբ, նոյեմբերի 21-ին կհրավիրվի արտահերթ նիստ:

Նշենք, որ եթե ԱԺ-ն չընդունի բյուջեի նախագիծը, ապա 2019 թվականի համար կգործեն 2018 թվականի բյուջեի համամասնությունները:

Հիշեցնենք, որ խորհրդարանը նոյեմբերի 1–ին լուծարվել է, սակայն, շարունակելու է աշխատանքները, մինչեւ նոր խորհրդարանի ձեւավորումը։ Արտահերթ խորհրդարանական ընտրությունները տեղի կունենան դեկտեմբերի 9–ին։ Դրան նախորդող շաբաթը նույնպես ԱԺ հերթական նստաշրջանն է։