Հարկային օրենսգրքի նախագիծը, որի մասին այդքան խոսվում է, արդեն պատրաստ է եւ արդեն միջգերատեսչական քննարկումների փուլում է: Այս մասին այսօր՝ նոյեմբերի 15-ին, կառավարությունում հայտարարեց ՊԵԿ նախագահ Դավիթ Անանյանը:
Նա նկատեց, որ Հարկային օրենսգիրքն ընդունելու եւ ուժի մեջ մտնելու հետ կապված խնդիր կա, քանի որ բարելավող դրույթները կարող են հետադարձ ուժով ընդունել, այդ թվում հունվարի 1-ից, սակայն վատթարացնող դրույթները չեն կարող:
«Ֆորմալ առումով, մենք կարող ենք նախագիծն ընդունել այս տարի, ուղղակի չգիտեմ մենք կհասցնե՞նք դեկտեմբերին եւս մեկ արտահերթ ԱԺ նիստի գնալ»,-ասաց նա:
Վարչապետի պաշտոնակատար Նիկոլ Փաշինյանն այս առնչությամբ ասաց. «Մենք նախընտրական փուլ ենք մտնում, որից հետո այլ պրոցեսներ են սկսվում: Ճիշտ է, դե յուրե գործող խորհրդարան ունենք, բայց կարող ենք այն խնդիրը, որ ունեցանք Ընտրական օրենսգրքի հետ, հիմա էլ Հարկային օրենսգրքի հետ ունենանք ու տեղապտույտի մեջ հայտնվենք:
Պետք է աշխատենք, որ հունվարին դա կարողանանք ընդունել: Քանի որ վատթարացնող դրույթներ կան, իսկ օրենսդրությունը պահանջում է, որ դրանք կարող են ուժի մեջ մտնել 6 ամիս անց: Գուցե կարողանանք այդ դրույթն էլ վերանայել: Եթե տեսնենք, որ ձեռնտու է, որ օրենսգիրքը օր առաջ մտնի ուժի մեջ: Սա քաղաքական որոշման հարց է»:
Փաշինյանի խոսքով, եթե հնարավոր չլինի հայտարարի գալ, որ այս անգամ բացառություն արվի եւ շուտ ուժի մեջ մտնի Հարկային օրենսգիրքը, ապա ստիպված կլինեն գնալ այն ճանապարհով, որ ամբողջ փաթեթն ուժի մեջ կմտնի 6 ամիս հետո:
Տնտեսական զարգացման եւ ներդրումների նախարար Տիգրան Խաչատրյանը մտահոգություն հայտնեց, որ եթե մեկ անգամ որոշեն փոխել վատթարացնող դրույթները 6 ամիս առաջ ընդունելու դրույթը, հետագայում կարող նման բացառությունները կրկնվել: