Հուսով ենք՝ ռեյտինգային ընտրակարգը չի վերածվի հեղինակությունների կամ «զոռբայությունների» պայքարի, ինչպես որ եղավ 2017թ.–ի խորհրդարանական ընտրությունների ժամանակ։ Այս մասին այսօր՝ նոյեմբերի 15–ին, խորհրդարանում լրագրողների հետ զրույցում ասաց «Ծառուկյան» խմբակցության պատգամավոր, ԲՀԿ համապետական ցուցակով առաջադրված Գեւորգ Պետրոսյանը։
«2017թ.–ի փորձը ցույց տվեց, որ ռեյտինգային ընտրակարգն առավելապես ծառայեց թաղային հեղինակությունների պայքարի տիրույթի, բայց հույս ունենք՝ այս ընտրություններին դա չի կրկնվի ու ռեյտինգային ընտրակարգը չի վերածվի զոռբայությունների, հեղինակությունների պայքարի»,– ասաց նա։
Անդրադառնալով ՀՀԿ–ի այն հայտարարությանը, թե իրենք հավակնում են լինել ընդդիմություն խորհրդարանում, Գեւորգ Պետրոսյանն ընդգծեց, որ ցանկացած ուժ մասնակցում է ընտրություններին՝ իշխանության գալու համար. «Դերաբաշխում, տեղաբաշխում չկատարենք, ժողցովուրդն է որոշելու, մենք գնում ենք առավելագույնի, մենք հայցում ենք ժողովրդի աջակցությունը, ինչքանով որ մեզ կաջակցի, մենք այնքան էլ կլինենք խորհրդարանում։ Ցանկացած կուսակցություն եթե չունի իշխանություն դառնալու նպատակ, պետք է լուծարվի, բայց իշխանություն ասվածը լայն հասկացություն է, կարող ես լինել ամբողջական իշխանություն, կամ մաս կազմել իշխանությանը»։
Նշենք, որ դեկտեմբերի 9–ին կայանալիք արտահերթ խորհրդարանական ընտրություններին մասնակցելու հայտ է ներկայացրել 11 ուժ։