Ամերիկյան զույգին եւ անօթեւանին, ում համար նրանք համացանցում հանգանակություն էին կազմակերպել, կասկածում են հանցավոր համաձայնության եւ խարդախության մեջ, հայտնում է CBSPhilly-ը:
Քեյթլին Մաքկլյուրը եւ Մարկ Դ՛Ամիկոն, որոնք GoFundMe կայքում 400 հազար դոլար էին հավաքել, կալանավորվել են, ապա ազատ արձակվել: Անօթեւան վետերան Ջոնի Բոբիթը, որին իբր ցանկացել են օգնել, նույնպես կալանավորվել է եւ կմնա կալանված:
Մաքկլյուրը պնդել է, որ Բոբիթի հետ ծանոթացել է 2017 թվականի նոյեմբերին, երբ ավտոմայրուղի մտնելիս իր ավտոմեքենայի ընթացքը խափանվել էր: Ոչ հեռվում մուրացկանություն անող անօթեւանն իբր վերջին 20 դոլարը ծախսել էր նրա համար բենզին գնելու համար: Նա որոշել էր նույնկերպ վարձահատույց լինել եւ Դ՛Ամիկոյի հետ համացանցում դրամահավաք էր սկսել:
«Ամբողջ արշավը հիմնված էր ստի վրա,- ասել է Բերլինգթոն շրջանի դատախազ Սքոթ Քոֆինան: - GoFundMe-ում դրամահավաքը սկսելուց մեկ ժամ չանցած Մաքկլյուրը ծանոթին տեքստային հաղորդագրություն է ուղարկել, որում խոստովանել է, որ Բոբիթին օգնությունը «սկզբից մինչեւ վերջ հորինվածք» է: Իր բենզինը չէր սպառվել, եւ նա իր վերջին 20 դոլարը չէր ծախսել: Իրականում Դ՛Ամիկոն, Մաքկլյուրը եւ Բոբիթը համաձայնության են եկել, որ սարքեն ու տարածեն սրտառուչ պատմություն, որը մարդկանց կստիպի փող նվիրաբերել»:
Քննությունը պարզել է, որ նրանք ծանոթ էին նվազագույնը մեկ ամիս նախքան GoFundMe-ում արշավը: Մաքկլյուրը եւ Դ՛Ամիկոն անօթեւանին հանդիպել են տեղական խաղատներից մեկն այցելության ժամանակ: Հավաքված փողը ծախսվել է ընդամենը մի քանի ամսում՝ Լաս Վեգաս ամանորյա ուղեւորության, BMW ավտոմեքենա եւ բազմաթիվ այլ իրեր, այդ թվում կանացի թանկարժեք պայուսակներ գնելու համար:
2018 թվականի օգոստոսին Բոբբիթը զույգին մեղադրել էր խաբեության մեջ: Նա հայտարարել էր, որ այդպես էլ չի տեսել այն բնակարանը, հանուն որի ձեռնարկվել էր դրամահավաքը: Նրան հասել էր միայն 75 հազար դոլար, անիվների վրա տուն, որը կանգնած էր Մաքկլյուրի եւ Դ՛Ամիկոյի հողամասում, եւ հին փիքափ, որը շուտով ջարդուխուրդ էր եղել: Նրանք բացատրել են, որ փողն իրենց մոտ են պահել,որ դրանք թմրանյութերի վրա չծախսի:
Հիմա երեքին սպառնում է մինչեւ 10 տարվա բանտարկություն:
