Ենթադրաբար՝ Ռուսաստանի կառավարության հետ կապված հաքերները հարձակում են իրականացնում ամերիկյան կառավարական գործակալությունների, ուղեղային կենտրոնների եւ մասնավոր ընկերությունների համակարգիչների վրա՝ ԱՄՆ Պետքարտուղարության աշխատակցի անունից ուղարկելով վնասաբեր ծրագրերով վարակված էլեկտրոնային նամակներ, հայտնում է Reuters-ը:
Նոյեմբերի 14-ին սկսված գործողության շրջանակում ենթադրաբար APT29 խմբի անդամ եւ Ռուսաստանի արտաքին հետախուզության ծառայության համար աշխատող հաքերները էլեկտրոնային նամակներ են ուղարկում ԱՄՆ Պետքարտուղարության աշխատակից Սյուզան Սթիվենսոնի անունից: Ստացողներին առաջարկվում է բեռնել իբր Հիզեր Նոյերթի գրած նամակները, ում ԱՄՆ նախագահ Դոնալդ Թրամփը նախատեսում է նշանակել ՄԱԿ-ում ԱՄՆ մշտական ներկայացուցիչ: Այս նամակները բացելու դեպքում տեղադրվում է վնասաբեր ծրագիրը, որը հաքերներին ապահովում է օգտատիրոջ համակարգչին լայն հասանելիությամբ, Reuters-ին ասել է ամերիկյան FireEye ընկերության ներկայացուցիչը, որը զբաղվում է կիբեռանվտանգությամբ:
Գործակալության զրուցակցի խոսքով՝ հարձակման են ենթարկվել FireEye-ի ավելի քան 20 հաճախորդներ, այդ թվում՝ ռազմական գործակալություններ, իրավապահ մարմիններ, Պենտագոնի կապալառուներ, մեդիայի ընկերություններ եւ դեղագործական ֆիրմաներ: CrowdStrike-ը եւ FireEye-ը չեն հստակեցրել, թե կոնկրետ որ ընկերություններն են հարձակման ենթարկվել եւ դրանցից քանիսին է վնաս հասցվել:
Հակավիրուսային սոֆթի մշակման ռուսական Kaspersky Lab ընկերությունը հաստատել է, որ այդ հարձակումները APT29-ից հաքերների ձեռքի գործն է, որոնք անցյալ տարվանից ակտիվություն չէին դրսեւորում: Reuters-ին չի հաջողվել մեկնաբանություն ստանալ Վաշինգթոնում Ռուսաստանի դեսպանատնից: Մոսկվան մշտապես հերքել է այն մեղադրանքները, որ հովանավորում է ԱՄՆ-ի դեմ հաքերային հարձակումները:
