Կառավարման քրեաօլիգարխիկ համակարգը, որ գոյություն ուներ նախքան հեղափոխությունը, վարչապետ Նիկոլ Փաշինյանի կողմից ոչնչացվել է, եւ այդ պայմաններում «ձայն բերողի» ինստիտուտի կարիքը չկա: Այս մասին NEWS.am-ի հետ զրույցում նշեց քաղտեխնոլոգ Արմեն Բադալյանը:
Նրա խոսքով, նախկինում մարդիկ ձայն բերում էին, որ հետագայում հայտնվելով ԱԺ-ում դրա դիմաց գործող իշխանությունից որոշակի արտոնություններ, քվոտաներ ստանան՝ կապված հարկեր չմուծելու, կամ ինչ-որ մենաշնորհներ ստանալու հետ: «Հիմա վարչապետը հայտարարել է, որ ներկրումն ազատ է, հարկերը բոլորը մուծում եմ,. հետեւաբար անիմաստ է, որ «ձայն բերող» օլիգարխը մտնի ՀՀԿ-ի ցուցակ: Երկրորդ, «ձայն բերողները» որպես կանոն լինում են իշխող ուժի մեջ. այսինքն նրանք չեն ցանկանում լինել իրեն ընդդիմադիր ՀՀԿ-ի ցուցակ»,-ասաց նա:
Արմեն Բադալյանը նկատեց, որ ՀՀԿ ցուցակում առաջին հորիզոնականներում քաղաքական դեմքեր են, բայց երբ մի փոքր ներքեւի հորիզոնականներն ենք նայում, տեսնում ենք, որ այնտեղ գործիչներ են, որոնց նկատմամբ խիստ բացասական վերաբերմունք կա հասարակության մեջ:
Քաղտեխնոլոգը կարծիք հայտնեց, որ ՀՀԿ-ն իշխանությունը կորցնելուց հետո պարտավոր էր ադապտացվել ստեղծված իրավիճակին, ռեբրենդինգ անել, սակայն ցուցակին նայելով այդ ռեբրենդինգը չի երեւում: «Նրանց ցուցակի առաջին տասնյակն է միայն քաղաքական դեմքերից կազմված, մնացածը հին գործիչներն են, որոնք չպետք է լինեին ցուցակում: 7-րդ հորիզոնականից հետո լրիվ նոր գործիչներ պետք է լինեին, բայց մենք տեսնում ենք, որ այդպես չէ, ու դա ՀՀԿ-ի կողմից կոպիտ սխալ է»,-ասաց նա:
Արմեն Բադալյանը ընդգծեց, որ թեեւ ՀՀԿ ցուցակը գլխավորում է Վիգեն Սարգսյանը, սակայն կուսակցության նախագահը շարունակում է մնալ Սերժ Սարգսյանը եւ ՀՀԿ-ի հակառակոդները հայտարարելու են, որ ձայն տալով ՀՀԿ-ին, մարդիկ ձայն են տալու Սերժ Սարգսյանին, այսինքն նրան, ում ժողովուրդը մերժել է ապրիլ-մայիսին: Սա, ըստ նրա, ՀՀԿ-ի երկրորդ կոպիտ սխալն է:
