ԱՄՆ նախագահ Դոնալդ Թրամփը շաբաթ հայտարարել է, որ ԱՄՆ-ից թուրք քարոզիչ Ֆեթուլլահ Գյուլենի արտահանձնման հնարավորության հարցը տվյալ պահին չի քննարկվում, սակայն չի բացառել, որ հետագայում կարող է վերադառնալ դրան: ԱՄՆ առաջնորդը այս մասին լրագրողներին հայտնել է Սպիտակ տանը՝ նախքան Քալիֆորնիա մեկնելը, հաղորդում է Fox News-ը:
«Դա չի քննարկվում <...> Մենք դա (Գյուլենի շուրջ ստեղծված իրավիճակը) միշտ հաշվի ենք առնում, բայց ոչ այս պահին», - ասել է պետության ղեկավարը `պատասխանելով քարոզչի արտահանձնման հնարավորության մասին հարցին:
«Այժմ մենք Թուրքիայի հետ շատ լավ ժամանակներ ենք ապրում: Ինչպես գիտեք, նա (Թուրքիայի նախագահ Թայիփ Էրդողանը) պաստոր Բրանսոնին վերադարձրել է ԱՄՆ... Մենք Թուրքիայի նախագահի հետ շատ լավ հարաբերություններ ունենք»,-ասել է Սպիտակ տան ղեկավարը՝ Էրդողանին իր ընկերը, «ուժեղ եւ խելացի մարդ» անվանելով:
Ուրբաթ ԱՄՆ արդարադատության նախարարությունից ՏԱՍՍ-ին ասել էին, որ սաուդցի լրագրող Ջամալ Խաշոգջիի սպանության ֆոնին Գյուլենի արտահանձնման հնարավորության մասին քննարկումներ չեն կատարվում: