ՌԴ նախագահի մամուլի խոսնակ Դմիտրի Պեսկովը հայտարարել է, որ Ճապոնիային Կուրիլյան կղզիների հանձնման որեւէ առանձին գործարք չի կարող լինել, տարածքի ավտոմատ հանձնումն անհնար է՝ տեղեկացնում է Ինտերֆաքսը։
Նա պարզաբանել է, որ Ռուսաստանի նախագահ Վլադիմիր Պուտինը եւ Ճապոնիայի վարչապետ Սինձո Աբեն այս խնդրի լուծման հիմք են վերցրել 1956թ․ խորհրդա-ճապոնական հռչակագիրը։ Կարելի՞ է արդյոք ասել, որ սա նշանակում է ինչ-որ տարածքների ավտոմատ հանձնում։ Բացարձա՛կ»,- ասել է Պեսկովը։ Նա կարծում է, որ Կուրիլների հարցում կպահանջվի փոխզիջում, որը չպետք է հակասի Ռուսաստանի եւ Ճապոնիայի շահերին։
Պեսկովը նաեւ նշել է, որ Տոկիոյի հետ խաղաղ պայմանավորվածության բանակցությունները կտարվեն հաշվի առնելով Ճապոնիայի դաշնակցային պարտավորությունները եւ այդ երկրի կողմից Ռուսաստանի դեմ ԱՄՆ պատժամիջոցներին սատարումը։
«Հանուն արդարության պետք է հիշել, որ չնայած Ճապոնիայի հետ խաղաղ պայմանագրի բարդություններին՝ այս հարցը պետք է լուծվի։ Այսպիսի բարդ թեմաները, այնուամենայնիվ, լուծելի են, եւ դա ցույց տվեց, օրինակ, Չինաստանի հետ տարածքային բանակցությունների փորձը»,- ասել է մամուլի քարտուղարը։
Վլադիմիր Պուտինը Սինգապուր կատարած իր այցի ընթացքում հանդիպել էր Սինձո Աբեի հետ։ ՌԴ նախագահը նոյեմբերի 15-ին ասել էր, թե Ճապոնիան պատրաստ կլիներ վերադառնալ 1956թ․ հռչակագրի հիման վրա խնդրի քննարկմանը, սակայն հռչակագրում եւս ամեն ինչ հստակ չէ։ Ավելի ուշ ճապոնական Asahi Shimbun-ը հայտնել էր, թե Աբեն Պուտինի հետ հանդիպման ժամանակ խոստացել է, որ Կուրիլյան կղզիների հանձնման դեպքում այնտեղ ամերիկյան ռազմաբազաներ չեն տեղակայվի։