Պահանջում ենք՝ ավելի շուտ-շուտ գալ մարզեր, ուշադրություն դարձնել մարզերին: Այս մասին, այսօր՝ նոյեմբերի 19-ին, Մարտունիում ՀՀ վարչապետի պաշտոնակատար Նիկոլ Փաշինյանի հետ հանդիպման ժամանակ նշեց մարտունեցիներից մեկը:
Նա ասաց, որ մինչեւ հիմա երկրի ղեկավարներն անուշադրության են մատնել մարզերը, ասել են. «Ձուկ ծախեք, կարտոշկա ցանեք, մենք երկիրը կղեկավարենք, բայց հիմա այդպես չի լինելու: Առաջարկում եմ ինձ որպես դուխով քաղաքացու, հրավիրեք կառավարության շենք թեյ խմելու: Դա համարեք որպես նախընտրական խոստում»:
Ի պատասխան Նիկոլ Փաշինյանն ասաց, որ այստեղ հավաքված բոլորն էլ ցանկանում են գալ թեյ խմելու, բայց կարեւորը դա չէ, այլ բոլորի համար հավասար հնարավորությունների ստեղծումը, որ քաղաքացիներն զգան, որ իրենք են երկրի տերը, որ կառավարությունը ընդամենը իրենց իղձերը իրականացնողն է:
Փաշինյանը խոսեց նաեւ քաղաքացիների պարտականություններից՝ նշելով. «ՀԴՄ խփելը դառնալու է անհանդուրժելի հանցագործություն: Եթե որեւէ մեկը ՀԴՄ չի խփում, դրանով էդքան մասով պակաս գումար է վճարում փողոցի այս փոսը ծածկելու համար, դպրոցները նորոգելու, թոշակները բարձրացնելու համար: Մենք ուզում ենք մարդկանց քաջալերենք հարստանալ ու հարստացնել պետությունը»: