Եթե ՀՀԿ-ին հաջողվի իրականացնել «միակ ընդդիմադիր» քաղաքական տեխնոլոգիան, ապա նա շանսեր կունենա հաղթահարել անցողիկ ժամը: Այս մասին այսօր՝ նոյեմբերի 19-ին, լրագրողների հետ հանդիպման ժամանակ նշեց քաղտեխնոլոգ Վիգեն Հակոբյանը:
«Ժամանակին Նիկոլ Փաշինյանն էր նույն տեխնոլոգիան օգտագործում: Նա հայտարարում էր, որ միակ ընդդիմադիրն ինքն է՝ այդպիսով փորձելով կոնսոլիդացնել ընդդիմադիր դաշտը եւ դրա համար նրան քարկոծում էին: Հիմա նույն բանը հանրապետականն է անում եւ եթե իրեն հաջողվի ճիշտ օգտագործել դա, նա կհաղթահարի անցողիկ շեմը»,- ասաց Վիգեն Հակոբյանը:
Քաղտեխնոլոգի խոսքով, ավելի է բարդանում իրավիճակը «Մենք» դաշինքի եւ եւ «Լուսավոր Հայաստան» կուսակցության պարագայում, քանի որ նրանք հիմնականում նույն ընտրազանգվածի վրա են աշխատում: «Հնարավոր է, որ երկուսն էլ չհայտնվեն խորհրդարանում»,- ասաց նա:
Ինչ վերաբերում է ՀՅԴ-ին, Վիգեն Հակոբյանն ասաց, որ այդ կուսակցության համար բարդ իրավիճակ է ստեղծվել, սակայն կուսակցությունն ամեն դեպքում թարմացված ցուցակով է ներկայացրել, որ այնքան էլ բնորոշ չէ իրենց:
«Դաշնակցությունը միշտ նոր հոսանքներ, նոր մոտեցումներ է բերում, այնուամենայնիվ, այդ փոփոխությունները այնքան սպառիչ չեն, որ նոր դեմքով հանդես գան»,- ասաց Վիգեն Հակոբյանը:
