Մենք խոշորացված համայնքները կթողնենք տեսնենք, թե ինչ արդյունքներ է լինում, բայց այս փուլում խոշորացում կանենք միայն այն համայնքներում, որոնց բնակիչները դա ուզում են: Այս մասին, այսօր՝ նոյեմբերի 19-ին, Մարտունի քաղաքում բնակիչների հետ հանդիպման ժամանակ նշեց ՀՀ վարչապետի պաշտոնակատար Նիկոլ Փաշինյանը:
«Եթե կան համայնքներ, որոնք ուզում են խոշորացում, թող պաշտոնապես դիմեն կառավարություն եւ մենք կընդառաջենք»,-ասաց նա:
Փաշինյանն անդրադարձավ նաեւ գազալցակայանների խնդրին, նաեւ նրան, որ օրինակ Սեւան քաղաքում գազը վաճառվում է 1 խմ-ն 190 դրամով, իսկ Մարտունիում՝ 200-210 դրամով:
Նա նշեց, որ Հայաստանում կա մոտ 380-390 գազալցակայան, որոնց մոտ 30 տոկոսը պատկանում է ոչ անհայտ անձանց. «Դուք գիտեք, որ գազալցակայաններում կան կորուստներ, կա նաեւ օգտագործվող գազի չափաքանակ: Հեղափոխությունից հետո մի շարք հայտնի անձանց պատկանող գազալցակայաններում գազի սպառման ծավալները կրկնապատկվել են: Սա հիմք է տալիս կասկածներ ունենալ, որ այդտեղ ժամանակին շատ խոշոր ստվեր է եղել: Հիմա ՊԵԿ-ը զբաղվում է դրանով: Այս համատեքստում կպարզվի նաեւ գազի գնագոյացման խնդիրը»,-ասաց Փաշինյանը: