Լիտվայի սեյմը Ինտերպոլից դուրս գալու հնարավորության մասին բանաձեւ է ընդունել, եթե կազմակերպության ղեկավար ընտրվի ռուս Ալեքսանդր Պրոկոպչուկը, հաղորդում է Delfi-ն:
Կողմ է քվեարկել 88 պատգամավոր, ձեռնպահ՝ 7, դեմ՝ ոչ ոք:
Մեն Խունվեյը, որը նախկինում Ինտերպոլի ղեկավարի պաշտոնն էր զբաղեցնում, սեպտեմբերի վերջին անհետացել էր: Ավելի ուշ պարզվել էր, որ նա ձերբակալվել է Չինաստանում, երկրի իշխանությունները նրան կասկածում են կոռուպցիայի մեջ: Խունվեյին ազատել էին պաշտոնից:
Բրիտանական Times-ը Ինտերպոլի ղեկավարի պաշտոնում գլխավոր հավակնորդ է անվանել ռուս Ալեքսանդր Պրոկոպչուկին: ԱՄՆ սենատորները դեմ են արտահայտվել կազմակերպության ղեկավարի պաշտոնում ռուսի ընտրությանը:
Ուկրաինան հայտարարել է, որ քննարկում է Ինտերպոլից երկրի անդամակցության կասեցման հնարավորությունը այն դեպքում, եթե Պրոկոպչուկը ընտրվի կազմակերպության ղեկավար:
Կրեմլը Միացյալ Նահանգներին մեղադրել է Ինտերպոլի ղեկավարի ընտրության հարցում ճնշման եւ միջամտության համար: