Առաջիկա ընտրությունները Հայաստանը վերադարձնում են 1990 թվականի իրավիճակին: Այս մասին նոյեմբերի 21-ին լրագրողների հետ հանդիպման ժամանակ ասաց քաղտեխնոլոգ Կարեն Քոչարյանը:
Նրա խոսքով՝ ինչպես 1990 թվականին, այնպես էլ այս ընտրություններին այնպիսի իրավիճակ կլինի, երբ լուրջ ֆինանսական միջոցներ չունեցող թեկնածուները իրենց թեկնածությունն առաջադրելու եւ մանդատ ստանալու հնարավորություն ունեն: «Այսօր այնպիսի իրավիճակ է ստեղծվել, որ խորհրդարան կարող են անցնել լուրջ ֆինանսական հնարավորություններ չունեցող եւ կուսակցական վերնախավի ներկայացուցիչ չհանդիսացող թեկնածուները: Դրանից բացի, ընտրությունները կանցնեն առանց կեղծիքների եւ ընտակաշառքի բաժանման, ինչպես եղել է 1990 թվականին»,- նշեց նա:
Կարեն Քոչարյանը նշեց, որ կուսակցությունների ցուցակները հաշվի առնելով՝ կարելի է պնդել, որ միանգամայն անսպասելի արդյունքներ են հնարավոր: «Հաշվի առնելով ռեյտինգային ընտրակարգի պահպանումը, ինչպես նաեւ կուսակցությունների թարմացված ցուցակները՝ կարելի է անսպասելի արդյունքներ կանխատեսել: Սա հատկապես վերաբերում է «Քաղաքացիական պայմանագրին»: Բացառված չեն այնպիսի իրավիճակները, երբ արդյունքում ֆավորիտ թեկնածուները կզիջեն պակաս հայտնի կուսակցին»,- պարզաբանեց փորձագետը:
Հիշեցնենք, որ արտահերթ խորհրդարանական ընտրությունները տեղի կունենան դեկտեմբերի 9-ին: Դրանց մասնակցում են 11 քաղաքական ուժեր: 1990 թվականին անցկացվել էին Խորհրդային Հայաստանի Գերագույն խորհրդի վերջին ընտրությունները: Դրանք եղել են վերջին 28 տարում միակ ընտրությունները, որոնց արդարությունը ոչ ոք չի վիճարկել: